Green Tea কিয় খাব লাগে? ঘৰতে কেনেকৈ গ্ৰীণ টি বনাব।
( অপূৰ্ব দাস )
আজিৰ দ্ৰুত গতিৰ জীৱনত মানুহ ক্ৰমান্বয়ে স্বাস্থ্য সচেতন হৈ পৰিছে। গ্ৰীণ টি এক অতি জনপ্ৰিয় আৰু উপকাৰী পানীয়ত পৰিণত হৈছে। ইয়াত নিয়মীয়া চাহতকৈ বহুগুণে বেছি এন্টিঅক্সিডেন্ট থাকে। ইয়াৰ পাতবোৰ বেছিকৈ ৰিফাইন কৰা নহয়, যাৰ ফলত ইয়াৰ প্ৰাকৃতিক গুণ সংৰক্ষণ হৈ থাকে । আয়ুৰ্বেদত শৰীৰৰ তাপৰ ভাৰসাম্য ৰক্ষা কৰা, হজম শক্তি উন্নত কৰা, মনক শান্ত কৰা পানীয়ৰ কথা আছে আৰু এই আয়ুৰ্বেদৰ পৰাই সেউজীয়া চাহ প্ৰস্তুত কৰা হ'য়। গ্ৰীণ টি সেই বিশেষ শ্ৰেণীৰ ভিতৰত অন্যতম। ইয়াৰ নিয়মিত সেৱনে শৰীৰৰ পৰা বিষাক্ত পদাৰ্থ উলিয়াই আনে, বিপাকীয় ক্ৰিয়া বৃদ্ধি কৰে আৰু স্বাস্থ্যৰ উন্নতি সাধন কৰে।
◽সেউজীয়া চাহ খোৱাৰ মূল উপকাৰ
(১) শৰীৰৰ পৰা বিষাক্ত পদাৰ্থ পৰিষ্কাৰ কৰে
সেউজীয়া চাহত কেটেচিন নামৰ এন্টিঅক্সিডেন্ট প্ৰচুৰ পৰিমাণে থাকে। এইবোৰে শৰীৰৰ পৰা ফ্ৰী ৰেডিকেল আঁতৰাই কোষবোৰক ক্ষতিৰ পৰা ৰক্ষা কৰে। ইয়াৰ ফলত ছালখন সুস্থ হৈ উঠে আৰু শৰীৰে লঘু আৰু শক্তিশালী অনুভৱ কৰে।
(২) ওজন কমাবলৈ সহায় কৰে
যিসকলে ওজন কমাব বিচাৰে তেওঁলোকৰ বাবে গ্ৰীণ টি অত্যন্ত উপকাৰী। ই বিপাকীয় ক্ৰিয়া ক্ষিপ্ৰ কৰে, যিয়ে শৰীৰত অতিৰিক্ত চৰ্বি ক্ষয় কৰাত সহায় কৰে। প্ৰতিদিনে পুৱা খালী পেটত সেৱন কৰিলে চৰ্বি ক্ষয় প্ৰক্ৰিয়া আৰু বেছি ক্ষীপ্ৰ হয়।
(৩) হৃদৰোগ স্বাস্থ্যৰ বাবে উপকাৰী
গ্ৰীণ টিয়ে বেয়া কলেষ্টেৰল (LDL) হ্ৰাস কৰে আৰু ভাল কলেষ্টেৰল (HDL) বৃদ্ধি কৰে। ইয়াৰ ফলত হৃদৰোগৰ সম্ভাৱনা কমি যায় আৰু ৰক্তচাপ নিয়ন্ত্ৰিত হয়।
(৪) মনক শান্ত আৰু সক্ৰিয় কৰি ৰাখে
গ্ৰীণ টিত সামান্য পৰিমাণৰ কেফেইন থাকে যদিও ই কফিৰ দৰে অস্থিৰতা সৃষ্টি নকৰে। ইয়াত পোৱা এমিনো এচিড এল-থিয়ানিনে মানসিক চাপ কমায় আৰু একাগ্ৰতা বৃদ্ধি কৰে।
(৫) হজম শক্তি উন্নত কৰে
যদি আপুনি সঘনাই গেছ, পেট ফুলা, গধুৰতা বা বদহজম অনুভৱ কৰে তেন্তে গ্ৰীণ টি এক উৎকৃষ্ট প্ৰতিকাৰ। ই হজম শক্তিৰ ভাৰসাম্য ৰক্ষা কৰে আৰু পেটত জমা হোৱা গেছ বাহিৰ কৰাত সহায় কৰে।
(৬) ছাল পৰিষ্কাৰ আৰু উজ্জ্বল কৰে
নিয়মিতভাৱে গ্ৰীণ টি সেৱনে ছালখন উজ্জ্বল কৰি তোলাত সহায় কৰে। ই ব্ৰণ, দাগ, বলিৰেখা কমোৱাত সহায় কৰে কাৰণ ইয়াত শক্তিশালী এন্টিঅক্সিডেন্ট থাকে।
(৭) প্ৰতিৰোধ ক্ষমতা বৃদ্ধি কৰে
সেউজীয়া চাহত এন্টিবেক্টেৰিয়েল আৰু এন্টিভাইৰেল গুণ আছে। ই শৰীৰৰ ৰোগ প্ৰতিৰোধ ক্ষমতা শক্তিশালী কৰে আৰু সাধাৰণ চৰ্দি প্ৰতিৰোধ কৰাত সহায় কৰে।
◽গ্ৰীণ টিৰ বাহিৰে—ঘৰতে বনোৱা আয়ুৰ্বেদিক পানীয় বা চাহ
যদি ঘৰত গ্ৰীণ টি পোৱা নাযায় বা আপুনি প্ৰাকৃতিক আয়ুৰ্বেদিক বিকল্প চেষ্টা কৰিব বিচাৰে তেন্তে তলত দিয়া পানীয়বোৰ অত্যন্ত উপকাৰী। ইয়ে শৰীৰক বিষমুক্ত কৰে, হজম শক্তি উন্নত কৰে, ৰোগ প্ৰতিৰোধ ক্ষমতা বৃদ্ধি কৰে।
(১) তুলসী-নেমুৰ চাহ
◽উপাদানসমূহ:
• ৫-৭ টা তুলসী পাত
• ১ চামুচ মৌ
• আধা নেমু
• ১-২ কাপ পানী
◽পদ্ধতিঃ পানী উতলাই তাত তুলসী পাত দিব। ৫ মিনিট উতলাই জুই বন্ধ কৰি দিব। কুহুমীয়া হ’লে নেমু আৰু মৌ দি পান কৰক।
◽ উপকাৰীতা: এই চাহে ৰোগ প্ৰতিৰোধ ক্ষমতা বৃদ্ধি কৰে, চৰ্দি আৰু কাহৰ পৰা উপশম দিয়ে, আৰু তৎক্ষণাত শক্তি প্ৰদান কৰে।
(২) আদা-হালধিৰ গৰম পানীয় বা চাহ
◽উপাদান
• ১ ইঞ্চি আদা
• ১/২ চামুচ হালধি ( কেঁচা )
• ১ চামুচ মৌ
• ১ কাপ পানী
◽পদ্ধতিঃ আদা পানীত দি উতলিবলৈ দিব। ৩ মিনিটৰ পিছত কেঁচা হালধি দি ১ মিনিট উতলিবলৈ দিব । কুহুমীয়া হ’লে মৌ দিব।
◽ উপকাৰীতা: এই চাহে হজম শক্তি উন্নত কৰে, গেছ আঁতৰায়, শৰীৰৰ তাপৰ ভাৰসাম্য ৰক্ষা কৰে, আৰু বিষ আৰু ফুলা কমায়।
(৩) ডালচেনি-মৌ চাহ
◽উপাদান
• আধা চামুচ ডালচেনি
• ১ চামুচ মৌ
• গৰম পানী
◽পদ্ধতিঃ ডালচেনি আৰু মৌ গৰম পানীত মিহলাই ৰাতিপুৱা খালী পেটত খাব লাগে।
◽ উপকাৰীতা: ওজন কমে, তেজৰ চেনি নিয়ন্ত্ৰণ হয়, পেটৰ সংক্ৰমণ দূৰ কৰাত সহায় কৰে।
(৪) জিৰা-ধনীয়া-মেথি ডিটক্স ড্ৰিংক
◽উপাদান
• ১ চামুচ জিৰা
• ধনীয়া ১ চামুচ
• ১ চামুচ মেথি
• ২ কাপ পানী
◽পদ্ধতিঃ সকলো উপাদান পিহি ৰাতি তিয়াই থব। ৰাতিপুৱা পানীত উতলাই চেকি লৈ পান কৰক।
◽ উপকাৰীতা: এই পানীয়ই হজম শক্তি উন্নত কৰে, ওজন হ্ৰাস কৰাত সহায় কৰে, আৰু যকৃত শক্তিশালী কৰে—বিশেষকৈ চৰ্বিযুক্ত যকৃত থকাসকলৰ বাবে উপকাৰী।
(৫) আমলখি-গিলয় পানী
◽উপাদান
• ১ চামুচ গিলয় পাউদাৰ বা সতেজ কাণ্ড
• ১ চামুচ আমলখিৰ ৰস
• ১ কাপ গৰম পানী
◽পদ্ধতিঃ দুয়োটা উপাদান গৰম পানীত মিহলাই ৰাতিপুৱা খাব লাগে।
◽ উপকাৰ: ৰোগ প্ৰতিৰোধ ক্ষমতা বৃদ্ধি কৰে, ছাল উজ্জ্বল কৰে, হজম শক্তি উন্নত কৰে, আৰু শৰীৰক সম্পূৰ্ণৰূপে বিষমুক্ত কৰে।
সেউজীয়া চাহ স্বাস্থ্যৰ বাবে অত্যন্ত উপকাৰী—ই ওজন হ্ৰাসৰ পৰা আৰম্ভ কৰি ৰোগ প্ৰতিৰোধ ক্ষমতা বৃদ্ধি, হৃদযন্ত্ৰৰ স্বাস্থ্য বজাই ৰখা আৰু উজ্জ্বল ছাল বজাই ৰখালৈকে অসংখ্য উপকাৰ প্ৰদান কৰে। কিন্তু যদি ঘৰত গ্ৰীণ টি পোৱা নাযায়, তেন্তে আয়ুৰ্বেদিক পানীয়বোৰো ঠিক তেনেদৰেই ফলপ্ৰসূ। তুলসী, আদা, হালধি, দালচেনি, গিলয়, আৰু আমলখি আদি প্ৰাকৃতিক উপাদানে শৰীৰক ভিতৰৰ পৰা শক্তিশালী কৰি কোনো পাৰ্শ্বক্ৰিয়া নোহোৱাকৈ দীৰ্ঘম্যাদী উপকাৰ প্ৰদান কৰে।
