চৰ্দি আৰু জ্বৰৰ পৰা দ্ৰুত নিৰাময়ৰ বাবে ফলপ্ৰসূ ঘৰুৱা প্ৰতিকাৰ
( অপূৰ্ব দাস )
সাধাৰণতে বতৰৰ পৰিবৰ্তন, ঠাণ্ডা বতাহ, ভিৰ কৰা ঠাইত ভাইৰাছৰ সংস্পৰ্শ বা ৰোগ প্ৰতিৰোধ ক্ষমতা দুৰ্বল হোৱাৰ ফলত চৰ্দি আৰু জ্বৰ হয়। যদিও ই এটা সাধাৰণ সমস্যা, তথাপিও ই যথেষ্ট ক্লান্তিকৰ হ’ব পাৰে। এই সময়ত কিছুমান সহজ আৰু নিৰাপদ ঘৰুৱা উপায়ে বহু সকাহ দিব পাৰে। বাহিৰলৈ ওলাই যাওঁতে মাস্ক পৰিধান কৰি সংক্ৰমণ ৰোধ কৰাৰ লগতে ৰোগ বিয়পি পৰাত বাধা দিব পাৰে।
(১) আদা-মৌৰ কাঢ়া
আদাৰ প্ৰদাহ নিবাৰণ কৰা ক্ষমতা আছে। ইয়াৰ এন্টিভাইৰেল, আৰু এন্টিবেক্টেৰিয়েল গুণো থাকে।
কেনেকৈ ব্যৱহাৰ কৰিব: এগিলাচ পানীত ১-২ ইঞ্চি আদা থেতেলিয়াই ৪–৫ মিনিট উতলাই লওক, ১ চামুচ মৌ দিব, দিনটোত দুবাৰকৈ খাব। ই ডিঙিৰ বিষ, ঠাণ্ডা, জ্বৰৰ পৰা সোনকালে উপশম দিয়ে।
(২) হালধি যুক্ত গাখীৰ
হালধিয়ে শৰীৰক ভিতৰৰ পৰা উষ্ণ কৰি ভাইৰাছৰ বিৰুদ্ধে যুঁজ দিয়াত সহায় কৰে ।
এনেকৈ পান কৰিব: গৰম গাখীৰত ১/২ চামুচ হালধি দিব ,ইচ্ছা কৰিলে এচিকুট ক’লা জালুকৰ গুড়ি দিব পাৰে। শুৱাৰ আগতে ইয়াক সেৱন কৰিলে শৰীৰৰ উষ্ণতাৰ ভাৰসাম্য ৰক্ষা কৰাত সহায় কৰে আৰু ভাল টোপনি অহাত সহায় কৰে।
(৩) তুলসী-ইলাচিৰ কাঢ়া
তুলসীক প্ৰাকৃতিক প্ৰতিৰোধ ক্ষমতা বৃদ্ধি কৰা বুলি গণ্য কৰা হয়।
পদ্ধতি: ৫-৭ টা তুলসীৰ পাত উতলাই লওক, ২ টা সৰু ইলাচি থেতেলিয়াই দিব , পানীত অলপ আদাৰ পেষ্ট দি কুহুমীয়া কৰি খাব। ভাইৰাছৰ সংক্ৰমণ আৰু চৰ্দিৰ বাবে ই অতি উপকাৰী।
(৪) ভাপ উশাহ লোৱা
ভাপ উশাহ ল’লে নাক বন্ধ হোৱা, গধুৰ মূৰৰ বিষ, কাহ আৰু চৰ্দি আদি লক্ষণৰ পৰা সোনকালে সকাহ পোৱা যায়।
কেনেকৈ কৰিব: গৰম পানীত ৫-৭ মিনিট ভাপ ল'ব।
ইচ্ছা কৰিলে ২-৩ টোপাল ইউকেলিপ্টাছ অইল দিব। ই নাক খুলি দিয়ে, ডিঙিৰ প্ৰদাহ কমায়, সংক্ৰমণ ৰোধ কৰাত সহায় কৰে।
(৫) কুহুমীয়া পানী আৰু নিমখ দি কুলকুলি কৰক
এই প্ৰতিকাৰে ডিঙিৰ বিষ আৰু প্ৰদাহ নিমিষতে শান্ত কৰে। ১ গিলাচ কুহুমীয়া পানীত সামান্য নিমখ মিহলাই কুলকুলি কৰক আৰু চিৰতা তিতা দিনে ১-২ বাৰ খাব লাগে।
(৬) প্ৰচুৰ পৰিমাণে কুহুমীয়া পানী খাব লাগে
চৰ্দি আৰু জ্বৰত পানীৰ অভাৱ হ’ব পাৰে। ৩০-৪০ মিনিটৰ মূৰে মূৰে কুহুমীয়া পানী খাব লাগে। ইয়াৰ ফলত বিষাক্ত পদাৰ্থবোৰ বাহিৰলৈ ওলাই যায় আৰু জ্বৰ সোনকালে কমোৱাত সহায় কৰে।
(৭) ভিটামিন চি সমৃদ্ধ খাদ্য
ভিটামিন চিয়ে শৰীৰৰ সংক্ৰমণৰ বিৰুদ্ধে যুঁজ দিয়াৰ ক্ষমতা বৃদ্ধি কৰে। কিন্তু কিছুমানৰ ক্ষেত্ৰত তেঙা ফলে কাহ-চৰ্দি বেছি কৰা দেখা যায়।
কি খাব লাগে: নেমুৰ পানী, আমলখি - এইবোৰে শৰীৰক ভাইৰাছৰ বিৰুদ্ধে যুঁজিবলৈ অধিক সক্ষম কৰি তোলে। অলপ ক’লা জালুকৰ গুড়ি , নিমখ আৰু আদা দি কম পৰিমাণে খালে ভাল।
(৮) খিচিড়ি, চূপ, আৰু লঘু আহাৰ
গধুৰ আহাৰ গ্ৰহণ কৰিলে জ্বৰ আৰু বেছি বেয়া হ’ব পাৰে। এই সময়ত লঘু খাদ্য খাব লাগে। মুগৰ দালিৰ খিচড়ি, শাক-পাচলিৰ জোল, গৰম আৰু পাতল দাইল সহজে হজম হোৱাৰ লগতে শৰীৰৰ শক্তি বজাই ৰাখে।
(৯) জিৰণি লোৱাটোৱেই আটাইতকৈ গুৰুত্বপূৰ্ণ
চৰ্দি আৰু জ্বৰৰ সময়ত শৰীৰে ভাইৰাছৰ বিৰুদ্ধে যুঁজ দিয়ে, গতিকে এনে সময়ত জিৰণিৰ প্ৰয়োজন হয়। ৭–৯ ঘণ্টা টোপনি, মোবাইল ফোন বা টিভিৰ পৰ্দাৰ পৰা আঁতৰি থকা, আৰু জিৰণি লোৱাটোৱে আৰোগ্য লাভ কৰাত সহায় কৰে।
◽ভিৰৰ মাজত মাস্ক পিন্ধাটো কিয় জৰুৰী?
আজিকালি সংক্ৰমণ দ্ৰুতগতিত বিয়পি পৰে। বতৰ সলনি হওক বা কিছুমান ভাইৰাছৰ প্ৰাদুৰ্ভাৱ বতাহ আৰু খাদ্যত বিয়পি পৰে , আপোনাৰ আৰু আনৰ সুৰক্ষাৰ বাবে মাস্ক পিন্ধাটো অতি গুৰুত্বপূৰ্ণ।
• মাস্ক পিন্ধাৰ উপকাৰিতা:
(১) ভাইৰাছ, ধূলি, আৰু ঠাণ্ডা বতাহৰ পৰা সুৰক্ষা – ঠাণ্ডা বতাহে ঠাণ্ডাৰ লক্ষণ আৰু বেয়া কৰি তুলিব পাৰে। সেয়েহে মাক্স পৰিধান কৰা উচিত।
(২) সংক্ৰমণৰ পৰা ৰক্ষা কৰে – যদি আপোনাৰ ইতিমধ্যে চৰ্দি বা জ্বৰ হৈছে, তেন্তে মাস্ক নিপিন্ধালে আপোনাৰ ওচৰ-চুবুৰীয়াক সোনকালে সংক্ৰমিত কৰিব পাৰে।
(৩) জনবহুল স্থানত সুৰক্ষা – শ্বপিং মল, বজাৰ, চিকিৎসালয়, কাৰ্যালয়, বা বাছ বা ৰেল সেৱাত মাস্ক পৰিধান কৰাটো অতি গুৰুত্বপূৰ্ণ।
(৪) ৰোগ প্ৰতিৰোধ ক্ষমতা কম হ’লে উপযোগী – ৰোগ প্ৰতিৰোধ ক্ষমতা কম থকাসকলে বিশেষ সাৱধানতা অৱলম্বন কৰিব লাগে আৰু মুখত মাস্ক ব্যৱহাৰ কৰা উচিত।
মাস্ক কেতিয়া পিন্ধিব:
• যেতিয়া ভিৰ কৰা ঠাইত থাকে
• বজাৰ বা ৰাজহুৱা স্থানত
• কাহ বা জ্বৰ হ’লে
• ঠাণ্ডা বতাহ বলিলে
• বায়ু প্ৰদূষণ হ'লে।
সাধাৰণতে ২–৪ দিনৰ ভিতৰত চৰ্দি আৰু জ্বৰ ভাল হয়, কিন্তু ঘৰুৱা ঔষধে আৰু অধিক ক্ষীপ্ৰতাৰে সকাহ দিব পাৰে। ভাপ, আদা-মৌ, হালধি যুক্ত গাখীৰ, তুলসীৰ কাঢ়া, আৰু জিৰণি আদি আটাইতকৈ ফলপ্ৰসূ প্ৰতিকাৰ। লগতে বাহিৰলৈ ওলাই যাওঁতে মাস্ক পৰিধান কৰি সংক্ৰমণ বিয়পি পৰাত বাধা দিয়ে আৰু শৰীৰক ঠাণ্ডা বতাহ আৰু ভাইৰাছৰ পৰা ৰক্ষা কৰিৰে।
যদি আপোনাৰ জ্বৰ ১০২ ডিগ্ৰী চেলছিয়াছতকৈ বেছি হয়, যদি আপুনি উশাহ-নিশাহ লোৱাত অসুবিধা অনুভৱ কৰে, ইয়াৰ লগতে বুকুৰ বিষ অনুভৱ কৰে, বা ৩–৪ দিনৰ ভিতৰত জ্বৰ থিক নহ'লে চিকিৎসকৰ পৰামৰ্শ লোৱা উচিত।
সুস্থ হৈ থাকক, সুৰক্ষিত থাকক।
