( অপূৰ্ব দাস )
যোগাসনৰ দ্বাৰা শাৰীৰিক আৰু মানসিক স্বাস্থ্যৰ উন্নতি সাধন হয়। প্ৰায় প্ৰতিটো স্বাস্থ্যজনিত সমস্যাৰ চিকিৎসা যোগ আৰু ধ্যান-ধাৰণাৰ জৰিয়তে পোৱা যায়। অৱশ্যে নিজৰ সামৰ্থ্য আৰু শৰীৰৰ প্ৰয়োজন অনুযায়ী সঠিক যোগাসন কৰিব লাগিব। বহু সময়ত প্ৰথমবাৰৰ বাবে যোগাসন কৰা লোকসকলে তেওঁলোকৰ সামৰ্থ্যৰ বাহিৰত হ’ব পৰা ভংগীমা অভ্যাস কৰি আৰম্ভ কৰে।
যদি আপুনি প্ৰথমবাৰৰ বাবে যোগাসন কৰিবলৈ ওলাইছে তেন্তে ক্ৰমান্বয়ে অনুশীলন বৃদ্ধি কৰক। ধৈৰ্য্য ধৰিব আৰু নিজৰ শৰীৰৰ অৱস্থা বুজিব। প্ৰথমবাৰৰ বাবে যোগাসন কৰা লোকসকলে কিছুমান সহজ আৰু ফলপ্ৰসূ আসনৰ পৰা আৰম্ভ কৰাটো অতি প্ৰয়োজনীয়, যাতে শৰীৰে ক্ৰমান্বয়ে নমনীয়তা আৰু শক্তি লাভ কৰিব পাৰে। কিছুমান মৌলিক যোগ আসন যিবোৰ আপুনি সহজে কৰিব পাৰে। তলত উল্লেখ কৰা হ'ল -
তাড়াসন :
এই যোগ পোনে পোনে থিয় হৈ কৰা হয় য'ত দুয়োখন ভৰিৰ মাজত অলপ দূৰত্ব থাকিব লাগে। তাৰ পিছত হাত দুখন পোনে পোনে ওপৰলৈ তুলি গোটেই শৰীৰটো টানি লোৱা হয়। ইয়াৰ সময়ত দীঘলকৈ উশাহ ল’ব লাগে আৰু কেইছেকেণ্ডমান এই অৱস্থাত থাকিব লাগে।
তাড়াসনৰ অভ্যাসে শৰীৰত ভাৰসাম্য বৃদ্ধি কৰে। মেৰুদণ্ড শক্তিশালী হৈ উঠে আৰু শৰীৰত শক্তি প্ৰবাহিত হয়।
বজ্ৰাসন :
এজন নতুন যোগীৰ বাবে বজ্ৰাসনৰ অভ্যাস তুলনামূলকভাৱে সহজ। ইয়াত আঁঠু কাঢ়ি গোৰোহাত বহিব লাগে। তাৰ পিছত পিঠিখন পোন কৰি ৰাখি উৰুৰ ওপৰত হাত থৈ দিয়া হয়। এই সময়ত স্বাভাৱিকভাৱে উশাহ লওক। নিয়মীয়াকৈ বজ্ৰাসন অভ্যাস কৰিলে হজম শক্তি উন্নত হয়। ই একাগ্ৰতাত সহায় কৰে। লগতে খাদ্য খোৱাৰ পিছত আধা ঘণ্টা বহিবলৈ এইটোৱেই আটাইতকৈ উপযুক্ত ভংগীমা।
ভূজংগাসন :
যিসকলে যোগাভ্যাস আৰম্ভ কৰিব ওলাইছে তেওঁলোকে নিশ্চয় ভুজংগাসনৰ অভ্যাস কৰিব লাগে। ইয়াৰ বাবে পেট পেলাই শুই হাতৰ তলুৱা কান্ধৰ তলত ৰাখক। লাহে লাহে শৰীৰৰ ওপৰৰ অংশটো ওপৰলৈ তুলি লওক। মূৰটো ওপৰলৈ তুলি বুকুখন বহল কৰক। দীঘলকৈ উশাহ লৈ লাহে লাহে এৰি দিব।
এই আসনৰ অভ্যাস কৰিলে পিঠি আৰু মেৰুদণ্ড শক্তিশালী হয়। পেটৰ অংগবোৰ মালিচ কৰা হয়। পাচনতন্ত্ৰ শক্তিশালী, ওজন হ্ৰাস আৰু মানসিক চাপ আৰু ক্লান্তিৰ পৰা উপশম পোৱাৰ বাবে এইটো এটা ফলপ্ৰসূ যোগব্যায়াম।
বালাসন (শিশুৰ ভংগীমা) :
যদি আপুনি দৈনন্দিন জীৱনত যোগাসন অন্তৰ্ভুক্ত কৰিবলৈ আৰম্ভ কৰিছে, তেন্তে প্ৰাৰম্ভিক মাহত বালাসন অভ্যাস কৰক। ইয়াৰ বাবে আঁঠু লৈ বহি কপালখন মাটিত ৰাখক। দুয়োখন হাত আগলৈ আগবঢ়াই দি গভীৰভাৱে উশাহ লওঁতে শিথিল হওক।
বালাসন অভ্যাস কৰিলে স্বাস্থ্যৰ বহু উপকাৰ পোৱা যায়। ইয়াৰ ফলত শৰীৰ আৰু মনলৈ গভীৰ শান্তি পোৱা যায়। ভাগৰ আৰু মানসিক চাপ নাইকিয়া হৈ যায়। পিঠি আৰু কান্ধৰ বিষৰ পৰা সকাহ দিয়ে।
