কোনবোৰ ৰোগত ছাগলীৰ মাংস খাব নালাগে?
( অপূৰ্ব দাস )
ছাগলীৰ মাংসত প্ৰচুৰ পৰিমাণে পুষ্টিকৰ উপাদান থাকে আৰু ইয়াত প্ৰটিন, আইৰণ, জিংক, ভিটামিন বি১২ আদি মৌল ভাল পৰিমাণে পোৱা যায়। কিন্তু ছাগলীৰ মাংস খোৱাটো কিছুমান স্বাস্থ্যজনিত অৱস্থাত ক্ষতিকাৰক হ’ব পাৰে। বিশেষকৈ কিছুমান গুৰুতৰ ৰোগ থকা লোকৰ বাবে ইয়াৰ সেৱন মধ্যমীয়া বা সম্পূৰ্ণ নিষিদ্ধ কৰা উচিত।
কোনবোৰ ৰোগত ছাগলীৰ মাংস খাব নালাগে জানো আহক।
১/ উচ্চ ৰক্তচাপ
ছাগলীৰ মাংসত অধিক পৰিমাণৰ চেচুৰেটেড ফেট আৰু কলেষ্টেৰল থাকে। ই শৰীৰত ৰক্তচাপ বৃদ্ধি কৰে । বেছিকৈ ছাগলীৰ মাংস খালে ধমনী বন্ধ হৈ যায়, যাৰ ফলত উচ্চ ৰক্তচাপ ৰোগীৰ ষ্ট্ৰোক আৰু হাৰ্ট এটেক হোৱাৰ সম্ভাৱনা বৃদ্ধি পায়। গতিকে উচ্চ বি পি ৰোগীয়ে ইয়াৰ সেৱন কম কৰিব লাগে বা সম্পূৰ্ণৰূপে পৰিহাৰ কৰিব লাগে।
২/ হৃদৰোগ
হৃদৰোগ থকা লোকৰ বাবে ছাগলীৰ মাংস ক্ষতিকাৰক। ছাগলীৰ মাংসত অধিক পৰিমাণৰ চেচুৰেটেড ফেট থাকে যিয়ে কলেষ্টেৰলৰ মাত্ৰা বৃদ্ধি কৰি হাৰ্ট এটেক আৰু অন্যান্য হৃদযন্ত্ৰৰ সমস্যাৰ সৃষ্টি কৰিব পাৰে। যিসকল লোকে ইতিমধ্যে বাইপাছ অস্ত্ৰোপচাৰ, এঞ্জিওপ্লাষ্টি বা হৃদযন্ত্ৰ বন্ধ হৈ আছে তেওঁলোকে ইয়াক গ্ৰহণ কৰিব নালাগে।
৩/ বাতবিষ
ছাগলীৰ মাংস খালে বাতবিষ বা গাঁঠিৰ বিষৰ সমস্যা বৃদ্ধি পায় । ছাগলীৰ মাংসত পিউৰিন নামৰ উপাদান থাকে যিয়ে শৰীৰত ইউৰিক এচিড বৃদ্ধি কৰে। ইউৰিক এচিড বৃদ্ধি হ’লে গাউট আৰু ফুলা, গাঁঠিত বিষ আৰু জ্বলা-পোৰা হয়। বাতবিষ আৰু ইউৰিক এচিড ৰোগত আক্ৰান্ত লোকে এনে ৰঙা মাংস ( ছাগলীৰ মাংস) পৰিহাৰ কৰিব লাগে।
৪/ বৃক্কৰ ৰোগ
উচ্চ প্ৰটিনযুক্ত খাদ্য বৃক্ক ৰোগীৰ বাবে বিপদজনক । ছাগলীৰ মাংসত অধিক পৰিমাণে প্ৰটিন আৰু পিউৰিন পোৱা যায়, যাৰ ফলত বৃক্কত অধিক চাপ পৰে। বৃক্ক দুৰ্বল হ’লে ইউৰিয়া, ক্ৰিয়েটিনিন আৰু ইউৰিক এচিডৰ মাত্ৰা বৃদ্ধি পায়। ইয়াৰ ফলত বৃক্কৰ কাৰ্য্যক্ষমতা আৰু অধিক অৱনতি ঘটিব পাৰে। গতিকে কিডনী ৰোগীয়ে চিকিৎসকৰ পৰামৰ্শ লৈহে মাংস খাব লাগে।
৫/ ডায়েবেটিছ
ডায়েবেটিছ ৰোগীয়ে যদি বেছি পৰিমাণে ছাগলীৰ মাংস খায় তেন্তে মেদবহুলতা, কলেষ্টেৰল আৰু ট্ৰাইগ্লিচাৰাইড বৃদ্ধি কৰিব পাৰে। ইয়াৰ ফলত হৃদৰোগ, ৰক্তচাপ আৰু বৃক্কৰ ৰোগ হোৱাৰ সম্ভাৱনা বৃদ্ধি পায়। ডায়েবেটিছ ৰোগীয়ে যদি মাংস খাব বিচাৰে তেন্তে অতি সীমিত পৰিমাণত আৰু কম মছলা দি উতলাই বা গ্ৰীল কৰি খাব পাৰে।
৬/ পাচনতন্ত্ৰৰ সমস্যা
ছাগলীৰ মাংস গধুৰ আৰু হজম হ’বলৈ বেছি সময় লাগে। বদহজম, এচিডিটি, গেছ, কোষ্ঠকাঠিন্য বা যিকোনো পাচন ৰোগ থকা লোকৰ বাবে ছাগলীৰ মাংস ক্ষতিকাৰক । ইয়াৰ ফলত পেটত গধুৰতা, জ্বলা-পোৰা আৰু ফুলি উঠিব পাৰে।
৭/ ফেটি লিভাৰ, লিভাৰ ৰোগ
যকৃতৰ ৰোগত আক্ৰান্ত ৰোগীৰ বাবে ছাগলীৰ মাংস ক্ষতিকাৰক। ইয়াত থকা অধিক চৰ্বিৰ পৰিমাণে যকৃতৰ ওপৰত অতিৰিক্ত বোজা জাপি দিয়ে আৰু চৰ্বিযুক্ত যকৃতৰ অৱস্থা অধিক গুৰুতৰ কৰি তোলে। যকৃতৰ কাৰ্য্যক্ষমতা কমি গ’লে মাংস হজম কঠিন হৈ পৰে।
ছাগলীৰ মাংস স্বাস্থ্যৰ বাবে উপকাৰী তেতিয়াহে যেতিয়া ব্যক্তিজন সম্পূৰ্ণ সুস্থ হৈ থাকে আৰু সীমিত পৰিমাণে সেৱন কৰে। যদি আপুনি ওপৰত উল্লেখ কৰা কোনো ৰোগত ভুগি আছে তেন্তে ছাগলীৰ মাংস খোৱাৰ আগতে চিকিৎসকৰ পৰামৰ্শ লওক। লগতে যদি মাংস খাব লাগে, তেন্তে সিজোৱা বা ভাপত দিয়া মাংস, কম তেল আৰু মছলাৰে তৈয়াৰী মাংস এটা উত্তম বিকল্প। অতিমাত্ৰা তেলত ভাজি আৰু জ্বলা- টেঙা দিয়া মাংসই এই ৰোগবোৰ আৰু অধিক ভয়াৱহ কৰি তুলিব পাৰে।
