কিয় কম বয়সতে কিডনী বিকলতা হ'বলৈ ধৰিছে ? কাৰণ, লক্ষণ আৰু প্ৰতিৰোধৰ পদ্ধতি জানিবলৈ পঢ়িব।
( অপূৰ্ব দাস )
বৃক্ক আমাৰ শৰীৰৰ এক গুৰুত্বপূৰ্ণ অংগ, যিয়ে তেজ ফিল্টাৰ কৰি শৰীৰৰ পৰা বিষাক্ত উপাদান আৰু অতিৰিক্ত পানী প্ৰস্ৰাৱৰ দ্বাৰা আঁতৰাই পেলায়। কিন্তু শেহতীয়া বছৰবোৰত যুৱক-যুৱতী আনকি কিশোৰ-কিশোৰীৰ ক্ষেত্ৰতো বৃক্ক বিকল হোৱাৰ ঘটনা দ্ৰুতগতিত বৃদ্ধি পাইছে। এইটো এটা চিন্তাৰ বিষয়, কাৰণ আগতে এই সমস্যা ৫০-৬০ বছৰ বয়সৰ পিছত দেখা গৈছিল।
এতিয়া প্ৰশ্ন হয়, কম বয়সতে বৃক্ক বিকল হৈ পৰিছে কিয়? ইয়াৰ লক্ষণ কি আৰু আমি ইয়াৰ পৰা কেনেকৈ হাত সাৰিব পাৰো? এই সকলোবোৰ কথা বিতংভাৱে বুজিবলৈ পঢ়িব।
বৃক্ক বিকল হোৱাৰ লক্ষণসমূহঃ
চিকিৎসকে কয় যে বৃক্ক বিকল হোৱাৰ আগতে শৰীৰে নিশ্চিতভাৱে কিছু সংকেত দিয়ে। যদি এই প্ৰাৰম্ভিক লক্ষণসমূহৰ প্ৰতি গুৰুত্ব দিয়া হয়, তেন্তে সময়মতে চিকিৎসা সম্ভৱ:
(১) সঘনাই বা অতি কম প্ৰস্ৰাৱ কৰা – প্ৰস্ৰাৱৰ ধৰণ সলনি হোৱা, হঠাতে প্ৰস্ৰাৱৰ পৰিমাণ বৃদ্ধি বা হ্ৰাস হোৱাটো এটা সতৰ্কবাণী হ’ব পাৰে।
(২) মুখ, ভৰি বা গোৰোহা ফুলা – বৃক্কই শৰীৰৰ পৰা তৰল পদাৰ্থ আঁতৰাবলৈ অক্ষম হ’লে শৰীৰ ফুলি উঠে।
(৩) সদায় ভাগৰুৱা অনুভৱ কৰা – বৃক্ক বিকল হ’লে তেজত বিষাক্ত পদাৰ্থ জমা হৈ ভাগৰুৱা আৰু দুৰ্বলতাৰ সৃষ্টি হয়।
(৪) ৰাতি সঘনাই উঠি প্ৰস্ৰাৱ কৰিবলৈ যোৱা – ইয়াৰ দ্বাৰা বৃক্কৰ ক্ষমতা হ্ৰাস পোৱাৰ ইংগিত পোৱা যায়।
(৫) প্ৰস্ৰাৱত ফেন বা তেজ – ই প্ৰ’টিন প্ৰস্ৰাৱৰ সৈতে নিৰ্গত হোৱা বা সংক্ৰমণৰ লক্ষণ হ’ব পাৰে।
(৬) ভোক কমি যোৱা, বমি বমি ভাব আৰু বমি – শৰীৰত বিষাক্ত পদাৰ্থ বৃদ্ধি পোৱাৰ বাবে হজম শক্তি প্ৰভাৱিত হয়।
(৭) ছালত খজুৱতি বা জ্বলা-পোৰা – তেজত দূষিত বস্তু থাকিলে ছালত ইয়াৰ প্ৰভাৱো পৰে।
(৮) পেশীৰ দুৰ্বলতা – ইলেক্ট্ৰলাইটৰ ভাৰসাম্যহীনতাৰ বাবে এই সমস্যাৰ সৃষ্টি হয়।
কম বয়সতে বৃক্ক বিকল হোৱাৰ মূল কাৰণসমূহঃ
(১) ডায়েবেটিছ আৰু উচ্চ ৰক্তচাপ
বিশ্ব স্বাস্থ্য সংস্থা (WHO)ৰ তথ্য অনুসৰি ভাৰতত বৃক্ক বিকল হোৱা ৰোগীৰ ৬০%তকৈ অধিক ৰোগী ডায়েবেটিছ আৰু উচ্চ বি পিৰ বাবে হয়।
ডায়েবেটিছে বৃক্কৰ শিৰাৰ ক্ষতি কৰে আৰু উচ্চ ৰক্তচাপে বৃক্কৰ ফিল্টাৰত চাপ দিয়ে।
(২) অনিয়মিত জীৱনশৈলী
আজিকালি যুৱক-যুৱতীসকলে ৰাতি দেৰিলৈকে শুই থাকে, জাংক ফুড খায়, পানী কমকৈ খায় আৰু ব্যায়াম নকৰে। ইয়াৰ ফলত বিপাকীয় ক্ৰিয়াত প্ৰভাৱ পৰে আৰু বৃক্কৰ স্বাস্থ্য দুৰ্বল হয়।
(৩) বিষনাশক, গেষ্ট্ৰীকৰ ঔষধ আৰু ষ্টেৰইডৰ অত্যধিক সেৱন
বিষ, গেষ্ট্ৰীক আদিৰ পৰা সকাহ পাবলৈ মানুহে প্ৰায়ে চিকিৎসকৰ পৰামৰ্শ নোলোৱাকৈ ঔষধ সেৱন কৰে। এই ঔষধবোৰে ক্ৰমান্বয়ে কিডনীৰ ক্ষতি কৰে।
(৪) প্ৰটিনৰ পৰিপূৰক আৰু শৰীৰ গঠনৰ ঔষধ
আজিকালি জিমলৈ যোৱা যুৱক-যুৱতীসকলে নিৰ্বিচাৰে প্ৰটিন পাউদাৰ আৰু চাপ্লিমেণ্ট ব্যৱহাৰ কৰে। অত্যধিক প্ৰ’টিন সেৱনে বৃক্কৰ ওপৰত অতিৰিক্ত বোজা জাপি দিয়ে। যাৰ ফলত বৃক্কৰ ক্ষতি হ'বলৈ আৰম্ভ কৰে।
(৫) ৰক্তহীনতা
শৰীৰত আইৰণ আৰু ভিটামিনৰ অভাৱ হ’লে ই বৃক্কতো প্ৰভাৱ পেলায় কাৰণ বৃক্কই তেজৰ জৰিয়তে অক্সিজেন লাভ কৰে।
(৬) ভাইৰাছৰ সংক্ৰমণ আৰু প্ৰস্ৰাৱ ধৰি ৰখা
পানী কমকৈ খোৱা, প্ৰস্ৰাৱ ধৰি ৰখা, সঘনাই সংক্ৰমণ হোৱা আদিয়েও বৃক্ক দুৰ্বল কৰি তোলে।
(৭) মানসিক চাপ আৰু মানসিক চিন্তা
অত্যধিক মানসিক চাপৰ ফলত শৰীৰত হৰম’নৰ ভাৰসাম্যহীনতা হয়, যাৰ ফলত ৰক্তচাপ আৰু চেনিৰ মাত্ৰা বৃদ্ধি পায় আৰু বৃক্কত প্ৰভাৱ পৰে।
কম বয়সতে বৃক্ক বিকল হোৱাৰ আশংকা কিয় বেছি হয়?
(১) প্ৰতিৰোধক আওকাণ কৰা: সাধাৰণতে যুৱক-যুৱতীসকলে নিজৰ স্বাস্থ্যৰ প্ৰতি গুৰুত্ব নিদিয়ে। লক্ষণবোৰক আওকাণ কৰে।
(২) সময়মতে পৰীক্ষা নকৰা: কিডনীৰ সমস্যাক “ছাইলেণ্ট কিলাৰ” বুলি কোৱা হয় কাৰণ ইয়াৰ প্ৰাৰম্ভিক লক্ষণ অতি সাধাৰণ আৰু মানুহে ইয়াক গুৰুত্বসহকাৰে নলয়।
(৩) ইণ্টাৰনেট আৰু গুগলৰ পৰা চিকিৎসা লোৱা: চিকিৎসকৰ পৰামৰ্শ নোলোৱাকৈ ঘৰতে বা ইণ্টাৰনেট ভিত্তিক চিকিৎসা কৰিলে অৱস্থা আৰু বেয়া হ’ব পাৰে।
বৃক্কৰ ৰোগ প্ৰতিৰোধৰ উপায়:
(১) সুস্থ জীৱনশৈলী গ্ৰহণ কৰক
(২) নিয়মিতভাৱে ব্যায়াম কৰক
(৩) পৰ্যাপ্ত পৰিমাণে টোপনি লোৱা উচিত
(৪) ধূমপান আৰু মদ্যপান পৰিহাৰ কৰক
(৫) সুষম খাদ্য গ্ৰহণ কৰক
(৬) নিমখ আৰু চেনি সেৱন সীমিত কৰক
(৭) জাংক ফুড, তেলাল আৰু ৰঙা মাংসৰ পৰা আঁতৰি থাকিব লাগে
(৮) সেউজীয়া শাক-পাচলি, ফল-মূল আৰু দালিৰ পৰিমাণ বৃদ্ধি কৰা উচিত
(৯) দিনে কমেও ৮-১০ গিলাচ পানী খাব লাগে
(১০) চিকিৎসকৰ পৰামৰ্শমতেহে ঔষধ খাব লাগে
বিশেষকৈ চিকিৎসকৰ পৰামৰ্শ মতেহে বিষনাশক, এন্টিবায়টিক আৰু ষ্টেৰইড ব্যৱহাৰ কৰিব লাগে।
(১১) নিয়মিতভাৱে চেনি আৰু বি পি পৰীক্ষা কৰাব লাগে
যদি পৰিয়ালত ডায়েবেটিছ বা বি পিৰ ইতিহাস আছে, তেন্তে নিয়মীয়াকৈ পৰীক্ষা কৰাটো গুৰুত্বপূৰ্ণ।
(১২) সুষম পৰিমাণৰ প্ৰটিন আৰু পৰিপূৰক সেৱন কৰা উচিত। জিমলৈ যোৱা যুৱক-যুৱতীসকলে বুজিব লাগিব যে অত্যধিক প্ৰটিন সেৱনে কিডনীত প্ৰভাৱ পেলাব পাৰে।
(১৩) প্ৰস্ৰাৱৰ লগত জড়িত কোনো সমস্যাক আওকাণ নকৰিব। যদি জ্বলা-পোৰা, ফেন, তেজ বা সঘনাই প্ৰস্ৰাৱ কৰাৰ সমস্যা হয়, তেন্তে লগে লগে চিকিৎসকৰ পৰামৰ্শ লওক।
বৃক্ক আমাৰ শৰীৰৰ অন্যতম গুৰুত্বপূৰ্ণ অংগ, যিটোক আওকাণ কৰিলে আমি গুৰুতৰ স্বাস্থ্যজনিত সমস্যাৰ সন্মুখীন হ’ব পাৰো। বিশেষকৈ আজিৰ যুৱ প্ৰজন্মত ইয়াৰ বিপদ দ্ৰুতগতিত বৃদ্ধি পাইছে। অনিয়মিত ৰুটিন, ভুল খাদ্যাভ্যাস, অত্যধিক মানসিক চাপ আৰু আত্ম-চিকিৎসা ইয়াৰ মূল কাৰণ।
যদি আমি সময়মতে লক্ষণবোৰ চিনি পাওঁ আৰু জীৱনশৈলীত প্ৰয়োজনীয় পৰিৱৰ্তন কৰো, তেন্তে এই ৰোগৰ পৰা হাত সাৰিব পাৰি। বৃক্কৰ স্বাস্থ্যৰ বাবে আমি নিয়মীয়াকৈ পৰীক্ষা কৰা, পৰ্যাপ্ত পৰিমাণৰ পানী খোৱা আৰু শৰীৰৰ প্ৰতিটো সংকেত গুৰুত্বসহকাৰে লোৱাটো গুৰুত্বপূৰ্ণ।
মনত ৰাখিব - বৃক্কৰ ৰোগ এটা নিৰৱ হত্যাকাৰী, কিন্তু সজাগতাই ইয়াৰ আটাইতকৈ ডাঙৰ নিৰাময়।
