থাইৰয়ড ৰোগীয়ে এইবোৰ পাচলি পৰিহাৰ কৰিব, নহ’লে সমস্যা বাঢ়িব পাৰে
Apurba Das
আমাৰ ডিঙিত থকা থাইৰয়ড গ্ৰন্থি এটা সৰু কিন্তু অতি গুৰুত্বপূৰ্ণ অংগ। ই আমাৰ শৰীৰৰ বিপাকীয় ক্ৰিয়া (খাদ্য শক্তিলৈ ৰূপান্তৰ), শক্তিৰ মাত্ৰা আৰু শৰীৰৰ উষ্ণতা নিয়ন্ত্ৰণ কৰা হৰম’ন উৎপন্ন কৰে। যেতিয়া থাইৰয়ডে সঠিকভাৱে কাম নকৰে তেতিয়া বহু সমস্যা আৰম্ভ হয়, বিশেষকৈ হাইপোথাইৰয়ডিজমত, য’ত থাইৰয়ড হৰম’ন কম উৎপাদন হয়।
ঔষধৰ লগতে থাইৰয়ড ৰোগীৰ বাবেও উপযুক্ত খাদ্যাভ্যাস অতি গুৰুত্বপূৰ্ণ। সাধাৰণতে স্বাস্থ্যকৰ বুলি গণ্য কৰা কিছুমান শাক-পাচলিয়ে থাইৰয়ডৰ সমস্যা আৰু অধিক ভয়াৱহ কৰি তুলিব পাৰে। থাইৰয়ড ৰোগীয়ে কোনবোৰ শাক-পাচলি পৰিহাৰ কৰিব লাগে বা সাৱধানে খাব লাগে জনাও আহক-
কবি পৰিয়ালৰ শাক-পাচলি (Goitrogens)
থাইৰয়ড ৰোগীয়ে কিছুমান বিশেষ শাক-পাচলিৰ প্ৰতি সাৱধান হ’ব লাগিব, যাক গ’ইট্ৰ’জেনিক বুলি কোৱা হয়। এইবোৰ যৌগ যিয়ে থাইৰয়ড গ্ৰন্থিৰ আয়’ডিন শোষণ ক্ষমতাত বাধাৰ সৃষ্টি কৰিব পাৰে। থাইৰয়ড হৰম’ন তৈয়াৰ কৰিবলৈ আয়’ডিন অতি প্ৰয়োজনীয়। এই শ্ৰেণীত মূলতঃ ক্ৰুচিফেৰাছ শাক-পাচলি যেনে বন্ধা কবি, ফুলকবি, ব্ৰকলি, আৰু ব্ৰাছেলছ স্প্ৰাউট আদি অন্তৰ্ভুক্ত কৰা হৈছে। এই শাক-পাচলিবোৰত গ্লুক’চিন’লেট নামৰ পদাৰ্থ থাকে, যিয়ে শৰীৰৰ থাইৰয়ডৰ কাম-কাজত বাধাৰ সৃষ্টি কৰে।
কেঁচা ব্যৱহাৰ আৰু বৃহৎ পৰিমাণৰ ব্যৱহাৰ পৰিহাৰ কৰক
যদিও এই পাচলিবোৰ পুষ্টিকৰ উপাদানৰ পৰিমাণ বেছি, তথাপিও থাইৰয়ড ৰোগীয়ে কেঁচাকৈ খোৱাৰ পৰা বিৰত থাকিব লাগে। কেঁচা অৱস্থাত ইহঁতৰ গ’ইট্ৰ’জেনিক গুণ বেছি। যেতিয়া আপুনি সেইবোৰ সিজাই খায় (যেনে উতলাই বা ভাপত দি) তেতিয়া এই যৌগবোৰৰ প্ৰভাৱ বহু পৰিমাণে হ্ৰাস পায়। গতিকে যদি আপুনি থাইৰয়ড ৰোগী আৰু এই শাক-পাচলিবোৰ খাব বিচাৰে তেন্তে সদায় ভালকৈ সিজোৱা উচিত আৰু একেবাৰে কম পৰিমাণত খাব লাগে। ৰসৰ ৰূপত বা কেঁচাকৈ বৃহৎ পৰিমাণে গ্ৰহণ নকৰিব, কিয়নো ইয়াৰ ফলত সমস্যাটো আৰু বেছি ভয়াৱহ হ’ব পাৰে।
অন্যান্য বিবেচনা আৰু বিশেষজ্ঞৰ পৰামৰ্শ
এই পাচলিবোৰৰ উপৰিও কিছুমান প্ৰতিবেদনত কোৱা হৈছে যে চয়াবিধ আৰু ইয়াৰ পৰা উৎপাদ সামগ্ৰীও গ’ইট্ৰ’জেনিক হ’ব পাৰে, গতিকে থাইৰয়ড ৰোগীয়ে ইয়াক পৰিমিতভাৱে সেৱন কৰিব লাগে। ইয়াৰ উপৰিও প্ৰচেছড খাদ্য আৰু গ্লুটেন খোৱাটোও কিছুমান থাইৰয়ড ৰোগীৰ বাবে সমস্যাজনক হ’ব পাৰে, বিশেষকৈ হাছিমোটোৰ থাইৰয়ড ৰোগীৰ বাবে।
এইটো বুজাটো গুৰুত্বপূৰ্ণ যে কেৱল খাদ্যই থাইৰয়ড নিৰাময় কৰিব নোৱাৰে, ই কেৱল ঔষধৰ লগতে সহায়ক হ’ব পাৰে। যদি আপুনি থাইৰয়ড ৰোগী তেন্তে সদায় চিকিৎসক বা যোগ্য খাদ্য বিশেষজ্ঞৰ পৰামৰ্শ লওক। আপোনাৰ ব্যক্তিগত অৱস্থা আৰু প্ৰয়োজন অনুসৰি সঠিক খাদ্য পৰিকল্পনা তৈয়াৰ কৰাত সহায় কৰিব পাৰে।
