( অপূৰ্ব দাস ,)
শেহতীয়াকৈ বিজ্ঞানীসকলে এক বেলেগ ধৰণৰ ডায়েবেটিছ আৱিষ্কাৰ কৰিছে। এইটো টাইপ-১ আৰু টাইপ-২ৰ পৰা সম্পূৰ্ণ পৃথক। এই ডায়েবেটিছৰ বিষয়ে জানো আহক-
আজিৰ সময়ত কম বয়সতো মধুমেহ ৰোগৰ বাবে মানুহে বহু সমস্যাৰ সন্মুখীন হৈছে। গতিকে এই ৰোগৰ বিষয়ে ভালদৰে জানি লোৱা উচিত । বহুতে হয়তো জানে যে ডায়েবেটিছ দুবিধ, তাৰ ভিতৰত টাইপ-১ আৰু টাইপ-২।
কিন্তু আপোনালোকে হয়তো এতিয়ালৈকে গম পোৱা নাই যে এই দুটা ডায়েবেটিছৰ বাহিৰেও মানুহে টাইপ ৫ নামৰ ডায়েবেটিছ ৰোগতো আক্ৰান্ত হ’ব পাৰে।
টাইপ ১ আৰু টাইপ ২ ডায়েবেটিছৰ পৰা বহু পৃথক এই বিৰল অৱস্থাৰ তদন্ত কৰি আছে এটা বিশ্বব্যাপী টাস্ক ফ’ৰ্চে। সংবাদ মাধ্যমৰ খবৰ অনুসৰি আন্তঃৰাষ্ট্ৰীয় ডায়েবেটিছ ফেডাৰেচনৰ সভাপতি অধ্যাপক পিটাৰ শ্ব’ৱাৰ্টজে এই সপ্তাহত বেংককত অনুষ্ঠিত হোৱা ডায়েবেটিছ ২০২৫ৰ বিশ্ব কংগ্ৰেছত এই কথা ঘোষণা কৰে।
ই টাইপ ১ আৰু টাইপ ২ৰ পৰা সম্পূৰ্ণ পৃথক :
টাইপ ৫ ডায়েবেটিছ কম ওজনৰ লোকক আক্ৰান্ত কৰে। ইয়াৰ লগতে যিসকলৰ পৰিয়ালত ডায়েবেটিছৰ কোনো ইতিহাস নাই আৰু যিসকলৰ টাইপ ১ বা টাইপ ২ ডায়েবেটিছৰ সাধাৰণ লক্ষণ দেখা নাযায় তেওঁলোকৰ এই ডায়েবেটিছ হোৱাৰ সম্ভাৱনা বেছি।
ভেলোৰৰ খ্ৰীষ্টিয়ান মেডিকেল কলেজ (চিএমচি)ৰ এণ্ডক্ৰাইন’লজী বিভাগৰ অধ্যাপক ডাঃ নিহাল থমাছে কয় যে টাইপ ৫ ডায়েবেটিছ ৰোগীৰ ওজন সাধাৰণতে কম, পাৰিবাৰিক ডায়েবেটিছৰ কোনো ইতিহাস নাথাকে আৰু টাইপ ১ বা টাইপ ২ ডায়েবেটিছৰ সৈতে মিল নোহোৱা লক্ষণ দেখা দিয়ে।
২০২২ চনত নিউয়ৰ্কৰ এলবাৰ্ট আইনষ্টাইন কলেজ অৱ মেডিচিনৰ অধ্যাপিকা মেৰেডিথ হকিন্সৰ সৈতে চিএমচিৰ ডাঃ থমাছ আৰু ডাঃ ৰিদ্ধি দাসগুপ্তাই এই অৱস্থাৰ ওপৰত অধ্যয়ন কৰি মূল শাৰীৰিক পাৰ্থক্য চিনাক্ত কৰে। ইয়াৰ ফলাফল ডায়েবেটিছ কেয়াৰ নামৰ আলোচনীখনত প্ৰকাশ পাইছিল।
টাইপ ৫ ডায়েবেটিছ কি?
এইটো হৈছে অপুষ্টিজনিত ডায়েবেটিছ, যিয়ে সাধাৰণতে কম পাতল আৰু অপুষ্টিকৰ কিশোৰ-কিশোৰী আৰু যুৱ প্ৰাপ্তবয়স্কসকলক আক্ৰান্ত কৰে। বিশেষকৈ এছিয়া আৰু আফ্ৰিকাত বিশ্বৰ ২০ৰ পৰা ২.৫ কোটি লোকৰ টাইপ ৫ ডায়েবেটিছ ৰোগত আক্ৰান্ত হয় বুলি অনুমান কৰা হৈছে। পূৰ্বৰ তথ্য অনুসৰি পুষ্টিহীনতা সম্পৰ্কীয় ডায়েবেটিছ ইনচুলিন প্ৰতিৰোধ ক্ষমতাৰ ফলত হয়।
কেনেকৈ ক্ষতি কৰে ?
কিন্তু টাইপ ১ ডায়েবেটিছ ৰোগীৰ দৰে ইনচুলিন বেজীয়ে এই ৰোগীসকলক উপকৃত নকৰে। কিছুমান ক্ষেত্ৰত ইয়াৰ ফলত তেজৰ চেনিৰ পৰিমাণ বিপদজনকভাৱে কম হ’ব পাৰে। আমেৰিকাৰ নিউয়ৰ্কৰ এলবাৰ্ট আইনষ্টাইন কলেজ অৱ মেডিচিনৰ গ্ল’বেল ডায়েবেটিছ ইনষ্টিটিউটৰ চিকিৎসা বিজ্ঞানৰ অধ্যাপিকা মেৰেডিথ হকিন্সে কয় যে, "এই ধৰণৰ ডায়েবেটিছ ৰোগীৰ ইনচুলিন নিঃসৰণ ক্ষমতাত এটা গুৰুতৰ দোষ থাকে যিটো পূৰ্বতে চিনি পোৱা নাছিল। এই আৱিষ্কাৰে এই অৱস্থাৰ বিষয়ে আমাৰ চিন্তাধাৰাত এক বৈপ্লৱিক পৰিৱৰ্তন আনিছে আৰু আমি ইয়াৰ চিকিৎসা কেনেকৈ কৰিব লাগে সেইটো অধ্যয়ন চলি আছে।"
শেহতীয়া অধ্যয়ন :
২০২২ চনত ডায়েবেটিছ কেয়াৰ নামৰ জাৰ্নেলত প্ৰকাশিত এক অধ্যয়নত হকিন্স আৰু তেওঁৰ সহযোগীসকলে ভেলোৰৰ খ্ৰীষ্টিয়ান মেডিকেল কলেজত প্ৰমাণ কৰিছিল যে পুষ্টিহীনতাৰ সৈতে জড়িত এই ডায়েবেটিচ ।
বিশেষজ্ঞগৰাকীয়ে কয় যে “চিকিৎসকসকল এতিয়াও এই ৰোগীসকলৰ চিকিৎসাৰ বিষয়ে নিশ্চিত নহয়, যিসকলে প্ৰায়ে ৰোগ নিৰ্ণয়ৰ এবছৰতকৈ অধিক সময়ৰ পাছতো জীয়াই নাথাকে।”
এই অৱস্থাটো ভালদৰে বুজিবলৈ আৰু চিকিৎসা পদ্ধতি বিকশিত কৰিবলৈ আইডিএফে এটা কৰ্মগোট গঠন কৰিছে। হকিন্সৰ মতে, এই অৱস্থাটো “ঐতিহাসিকভাৱে কম নিৰ্ণয় কৰা হৈছে আৰু ভালদৰে বুজা হোৱা নাই”। তেওঁ কয় যে "পুষ্টিহীনতাৰ সৈতে জড়িত ডায়েবেটিছ যক্ষ্মাতকৈ অধিক ক্ষতিকাৰক আৰু এইচ আই ভি/এইডছৰ দৰেই প্ৰায় একে"।
