( অপূৰ্ব দাস )
অতিমাত্ৰা খাদ্য খোৱাৰ বাবেই নহয়, আপোনাৰ কিছুমান ভুল অভ্যাসৰ বাবেও মেদবহুলতা বৃদ্ধি পায়। যদি আপুনি সুস্থ হৈ থকাৰ লগতে ফিট হৈ থাকিব বিচাৰে, তেন্তে আপোনাৰ বাবে আপোনাৰ জীৱনৰ কিছুমান অভ্যাস ত্যাগ কৰাটো অতি প্ৰয়োজনীয়।
অতিৰিক্ত ওজন আৰু মেদবহুলতাৰ সমস্যা সকলো বয়সৰ লোকৰ ক্ষেত্ৰত দেখা যায়। মেদবহুলতাই আপোনাৰ চেহেৰা নষ্ট কৰাই নহয়, ই অতি গুৰুতৰ আৰু দীৰ্ঘদিনীয়া ৰোগৰ সম্ভাৱনাও বহুগুণে বৃদ্ধি কৰে।
অতিৰিক্ত ওজনৰ লোকৰ ৰোগ প্ৰতিৰোধ ক্ষমতাও দুৰ্বল হৈ পৰে, যাৰ বাবে এনে লোকৰ সংক্ৰমণ আৰু ৰোগৰ আশংকা বৃদ্ধি পায়। যদি আপুনিও অতিৰিক্ত ওজনৰ বাবে অসুবিধা পাইছে, তেন্তে আজিৰ পৰাই ইয়াক হ্ৰাস কৰাৰ চেষ্টা আৰম্ভ কৰক। স্বাস্থ্যৰ অধিক অৱনতি ঘটিবলৈ আৰম্ভ কৰাৰ আগতে সাৱধান হওক।
মেদবহুলতা এক জটিল সমস্যা যাৰ বহু কাৰণ থাকিব পাৰে। অতিমাত্ৰা খাদ্য খোৱাটো এটা কাৰণ, কিন্তু ইয়াৰ বাহিৰেও আন বহুতো ভুলৰ ফলত মেদবহুলতাও হ’ব পাৰে। যেনে নিয়মিতভাৱে ব্যায়াম বা শাৰিৰীক পৰিশ্ৰম নকৰা, পৰ্যাপ্ত টোপনি নোহোৱা, মানসিক চাপ আৰু উদ্বেগৰ মাত্ৰা বৃদ্ধি, আৰু অনিয়মিত জীৱনশৈলী গ্ৰহণ কৰা। ইয়াৰ উপৰিও কিছুমান মানুহৰ জিনীয় কাৰণত মেদবহুলতাৰ সমস্যাও হ’ব পাৰে।
গতিকে মেদবহুলতাৰ সমস্যা সমাধান কৰিবলৈ আমি এই সকলোবোৰ কাৰণৰ প্ৰতি গুৰুত্ব দিব লাগিব। ইয়াত নিয়মীয়াকৈ ব্যায়াম বা শাৰিৰীক পৰিশ্ৰম নকৰাটো মেদবহুলতাৰ এটা প্ৰধান কাৰণ। ব্যায়াম কৰিলে আমাৰ শৰীৰত শক্তি খৰচ হয়, যাৰ ফলত আমাৰ শৰীৰত চৰ্বিৰ সঞ্চয় কমি যায়। ইয়াৰ উপৰিও ব্যায়ামৰ ফলত আমাৰ শৰীৰৰ পেশীৰ বিকাশ ঘটে, যাৰ ফলত আমাৰ শৰীৰৰ বিপাকীয় হাৰ বৃদ্ধি পায়। গতিকে আমি আমাৰ জীৱনশৈলীৰ ভুলবোৰ আঁতৰ কৰি স্বাস্থ্যসন্মত খাদ্য গ্ৰহণ কৰিলেহে সু-স্বাস্থ্য আৰু সৌন্দৰ্য্য লাভ কৰিব পাৰিম।
মেদবহুলতাৰ ফলত কি কি ৰোগ হ'ব পাৰে?
মেদবহুলতা হৈছে এক জটিল সমস্যা যাৰ ফলত শৰীৰত অতিৰিক্ত চৰ্বিৰ সৃষ্টি হয়, যাৰ ফলত স্বাস্থ্যৰ ওপৰত নেতিবাচক প্ৰভাৱ পৰে। নেচনেল ইনষ্টিটিউট অৱ ডায়েবেটিছ এণ্ড ডাইজেষ্টিভ এণ্ড কিডনী ডিজিজত প্ৰকাশিত এক অধ্যয়নত দেখা গৈছে যে ইয়াৰ দ্বাৰা বিভিন্ন স্বাস্থ্যজনিত সমস্যা, যেনে টাইপ ২ ডায়েবেটিছ, হৃদৰোগ, মগজুৰ ষ্ট্ৰোক, ফেটি লিভাৰ, স্তন কেন্সাৰ, আৰু লিভাৰকে ধৰি কেইবাবিধো কৰ্কট ৰোগৰ সম্ভাৱনা বৃদ্ধি পায়। ইয়াৰ ফলত বহু সমস্যাৰ সৃষ্টি হ’ব পাৰে, সেয়েহে সময়ত ইয়াক হ্ৰাস কৰাটো অতি প্ৰয়োজনীয় ।
মেদবহুলতাৰ পৰা মুক্তি পাবলৈ এইবোৰ অভ্যাস ত্যাগ কৰক :
১/ পৰ্যাপ্ত টোপনি
আজিৰ সময়ত মানুহৰ জীৱনশৈলীত গভীৰ নিশালৈকে মোবাইল ব্যৱহাৰ কৰা, চিনেমা, ৱেব চিৰিজ চোৱা আৰু গভীৰ নিশালৈকে কাম কৰাটো সাধাৰণ কথা, কিন্তু আপোনাৰ এই অভ্যাসে আপোনাৰ ওজন দ্ৰুতগতিত বৃদ্ধি কৰিব পাৰে। টোপনিৰ অভাৱে আপোনাৰ শৰীৰত হৰম’নৰ ভাৰসাম্যহীনতা সৃষ্টি কৰে, আৰু ইয়াৰ বাবেই ক্ষুধাক উদ্দীপিত কৰা হৰম’ন ঘ্ৰেলিন অধিক সক্ৰিয় হৈ পৰে আৰু আপুনি খাদ্যৰ বাবে হাহাকাৰ কৰিবলৈ আৰম্ভ কৰে। গতিকে প্ৰতিদিনে কমেও ৭-৮ ঘণ্টা ভাল টোপনি লোৱাৰ লগতে ৰাতি সোনকালে শুবলৈ চেষ্টা কৰক।
২/ অত্যধিক মানসিক চাপ
আজিকালি মানসিক চাপৰ সমস্যা বেছিভাগ মানুহৰে দেখা যায় আৰু যদি আপুনি সেইসকল লোকৰ ভিতৰত থাকে যিসকল সদায় মানসিক চাপত থাকে তেন্তে এয়া আপোনাৰ মেদবহুলতাৰ এটা ডাঙৰ কাৰণ হ’ব পাৰে। মানসিক চাপৰ বাবে শৰীৰত “কৰ্টিছল” হৰম’নৰ মাত্ৰা বৃদ্ধি পায়, যাৰ বাবে শৰীৰত চৰ্বি দ্ৰুতগতিত জমা হয়, আৰু এই চৰ্বি বেছিভাগেই পেট আৰু কঁকালৰ ওচৰত জমা হয় । মানসিক চাপ কমাবলৈ আৰু মেদবহুলতাৰ পৰা হাত সাৰিবলৈ যোগাসন, ধ্যান আৰু ব্যায়াম দৈনন্দিন জীৱনত অন্তৰ্ভুক্ত কৰক।
৩/ এলেহুৱা হোৱা
যদি আপুনি দৈনন্দিন জীৱনত শাৰীৰিক ক্ৰিয়া-কলাপ হ্ৰাস কৰি আছে আৰু সকলো সময়তে বহি থাকে, তেন্তে আপোনাৰ ওজন দ্ৰুতগতিত বৃদ্ধি পায়। কাৰণ কোনো কাৰ্য্যকলাপ অবিহনে কেলৰি জ্বলাব নোৱাৰি আৰু ই চৰ্বি হিচাপে জমা হৈ পৰে। এই কাৰণে প্ৰতিদিনে কমেও ৪০-৫০ মিনিট ব্যায়াম বা খোজ কাঢ়িব লাগিব। যদি অফিচত বেছি সময় বহিবলগীয়া হয় তেন্তে মাজতে খোজ কঢ়া আৰম্ভ কৰক।
৪/ সঠিক সময়ত খোৱা
আপুনি কেতিয়াবা বেছিকৈ কেতিয়াবা কমকৈ খায় নেকি, নে ৰাতি বহুত দেৰিকৈ খায়? এই অভ্যাসবোৰৰ ফলত ওজন বৃদ্ধি (মেদবহুলতা) হ’ব পাৰে। অনিয়মিত খাদ্য খোৱাৰ ফলত বিপাকীয় ক্ৰিয়া লেহেমীয়া হয় আৰু শৰীৰত চৰ্বি জমা হয়। এনে অৱস্থাত প্ৰতিদিনে নিৰ্দিষ্ট সময়ত খাদ্য খাব লাগে আৰু শুৱাৰ ২-৩ ঘণ্টা আগতে ৰাতিৰ আহাৰ গ্ৰহণ কৰিব লাগে।
৫/ এইবোৰ খাদ্য খোৱা বন্ধ কৰক
মাদক দ্ৰব্য, অত্যধিক তেলাল খাদ্য, প্ৰতিদিনে মাছ-মাংস-কণী খোৱা বন্ধ কৰক। ইয়াৰ পৰিৱৰ্তে শাক-পাচলি, ফল-মূল বেছিকৈ খাবলৈ আৰম্ভ কৰক।
পানী খোৱাৰ পৰিমাণ বৃদ্ধি কৰক।
