দক্ষিণমুখী ঘৰ এটাত বাস্তু দোষ কিয় হয় ?
যদি মূল দুৱাৰখন এই দিশলৈ মুখ কৰি থাকে তেন্তে কি কি বাস্তু প্ৰতিকাৰ কৰিব লাগে? জানিবলৈ পঢ়িব।
( অপূৰ্ব দাস )
বাস্তু শাস্ত্ৰ হৈছে ভাৰতৰ এক প্ৰাচীন বিজ্ঞান, যিটো আমাৰ জীৱন-যাপন, কৰ্মজীৱন আৰু জীৱনৰ প্ৰতিটো ক্ষেত্ৰতে ধনাত্মক শক্তি বৃদ্ধিৰ নীতিৰ ওপৰত ভিত্তি কৰি গঢ় লৈ উঠিছে। বাস্তুৰ মতে ঘৰৰ মুখ বা মূল দুৱাৰ যি দিশত থাকে, ইয়াৰ প্ৰত্যক্ষ প্ৰভাৱ ঘৰত বসবাস কৰা লোকসকলৰ স্বাস্থ্য, সমৃদ্ধি, সুখ, শান্তি আৰু জীৱনশৈলীৰ ওপৰত পৰে।
এই সকলোবোৰ দিশৰ মাজত প্ৰায়ে মানুহৰ মাজত দক্ষিণ দিশটোক লৈ বিভ্ৰান্তি আৰু ভয় দেখা যায়। দক্ষিণমুখী ঘৰ এটাক বহুতে অশুভ বুলি গণ্য কৰে।
প্ৰশ্ন উত্থাপন হয় যে এনেকুৱা কিয় হয়? দক্ষিণ দিশে বাস্তু দোষৰ সৃষ্টি কৰে নেকি? আৰু যদি আপোনাৰ ঘৰটো দক্ষিণমুখী হয়, তেন্তে আপুনি কি কি বাস্তু প্ৰতিকাৰ গ্ৰহণ কৰিব লাগিব ?
এই লেখাটোত আপুনি এই প্ৰশ্নবোৰৰ উত্তৰ বিতংভাৱে জানিব পাৰিব।
• দক্ষিণ দিশৰ গুৰুত্ব
বাস্তু শাস্ত্ৰৰ মতে চাৰিটা মূল দিশ (পূব, পশ্চিম, উত্তৰ, দক্ষিণ) আৰু চাৰিটা কোণ (ঈশান, অগ্নি, নৈঋত্য, বায়ব্য)কে ধৰি মুঠ আঠটা দিশ আছে। প্ৰতিটো দিশৰ এক বিশেষ তাৎপৰ্য আৰু শক্তি আছে।
দক্ষিণ দিশৰ শাসক গ্ৰহক যম (মৃত্যুৰ ঈশ্বৰ) বুলি ধৰা হয়। ইয়াৰ বাবেই এই দিশক লৈ মনত এক ভয়ৰ সৃষ্টি হয় । কিন্তু বাস্তু শাস্ত্ৰই দক্ষিণ দিশ অশুভ বুলি কোৱা নাই। যদি এই দিশটো সঠিকভাৱে ব্যৱহাৰ কৰা হয়, তেন্তে ই অতি উপকাৰী বুলিও প্ৰমাণিত হ’ব পাৰে।
দক্ষিণমুখী ঘৰত বাস্তু দোষ কিয় হ'ব পাৰে?
• শক্তিৰ প্ৰবাহ
বাস্তুৰ মতে ধনাত্মক শক্তি সাধাৰণতে উত্তৰ-পূব (ঈশান) দিশৰ পৰা প্ৰৱেশ কৰি দক্ষিণ-পশ্চিম দিশত জমা হয়।
যেতিয়া মূল দুৱাৰখন দক্ষিণ দিশত থাকে, তেতিয়া শক্তিৰ এই প্ৰবাহত বাধা আহিব পাৰে বা বিপৰীত দিশত থকাৰ বাবে ধনাত্মক শক্তি ( শুভ শক্তি ) হেৰুৱাব পাৰে।
• ভয় আৰু বিশ্বাস
পৰম্পৰাগত বিশ্বাস যে দক্ষিণ দিশটো মৃত্যুৰ প্ৰতীক, গতিকে দক্ষিণ দিশৰ ফালে মুখ কৰিলে ঘৰত ঋণাত্মক শক্তি বৃদ্ধি পাব পাৰে।
অৱশ্যে এইটো এটা ধাৰণা। বাস্তু দোষৰ সৃষ্টি হয় যেতিয়া দুৱাৰৰ স্থান, ঘৰৰ মানচিত্ৰ, আৰু অন্যান্য বাস্তুৰ নিয়ম সঠিকভাৱে পালন নকৰিলে।
• সূৰ্যৰ পোহৰ আৰু তাপমাত্ৰা
গোটেই দিনটো দক্ষিণ দিশৰ পৰা সূৰ্য্যৰ ৰশ্মি আহে, যাৰ ফলত অত্যধিক তাপ হয়। যদি ঘৰটো সঠিকভাৱে ডিজাইন নকৰিলে ঘৰৰ উষ্ণতা ভাৰসাম্যহীন হৈ থাকে, যাৰ ফলত মানসিক আৰু শাৰীৰিক অসুস্থতা বৃদ্ধি পায়।
• ধনৰ ক্ষতি আৰু অস্থিৰতা
ভুল ঠাইত দক্ষিণমুখী দুৱাৰ এখন থাকিলে বাস্তুৰ দোষৰ সৃষ্টি হয়, যাৰ ফলত ঘৰত ধন হেৰুৱা, বিভিন্ন সমস্যা, মানসিক চাপ, ৰোগ, পাৰিবাৰিক বিবাদৰ সম্ভাৱনা বৃদ্ধি পায়।
দক্ষিণমুখী ঘৰ ক্ৰয় কৰিব লাগে নে নালাগে ?
দক্ষিণমুখী ঘৰ ক্ৰয় কৰিব নালাগে বুলি ক’লে সম্পূৰ্ণ শুদ্ধ নহ’ব। আজিকালি চহৰত মাটিৰ উপলব্ধতা সীমিত আৰু সকলো দিশৰ ঘৰ সমানে উপলব্ধ নহয়।
যদি বাস্তুৰ নিয়ম অনুসৰি দক্ষিণমুখী ঘৰ এটা সঠিকভাৱে নিৰ্মাণ কৰা হয় আৰু উপযুক্ত ব্যৱস্থা গ্ৰহণ কৰা হয়, তেন্তে ই অত্যন্ত শুভও হ’ব পাৰে। দক্ষিণ দিশক খ্যাতি, শক্তি আৰু স্থিৰতাৰ দিশ বুলিও ধৰা হয়। দক্ষিণমুখী ঘৰ এটা ব্যৱসায়ী, চৰকাৰী বিষয়া, ৰাজনীতিবিদ ইত্যাদিৰ বাবে উপকাৰী বুলি প্ৰমাণিত হ’ব পাৰে।
দক্ষিণমুখী ঘৰৰ বাস্তু প্ৰতিকাৰ :
যদি আপোনাৰ ঘৰটো দক্ষিণমুখী হয়, তেন্তে ভয় নকৰিব। তলত কিছুমান সহজ বাস্তুৰ প্ৰতিকাৰ দিয়া হ’ল যিবোৰ আপুনি আপোনাৰ ঘৰত ইতিবাচক শক্তি বজাই ৰাখিবলৈ গ্ৰহণ কৰিব পাৰে:
১/ মূল দুৱাৰৰ স্থান
• দক্ষিণ-পূবৰ অগ্নি কোণ অংশত থকা দুৱাৰখন আটাইতকৈ শুভ বুলি গণ্য কৰা হয়।
• দক্ষিণ-পশ্চিম কোণত দুৱাৰ নিৰ্মাণ কৰাটো সম্পূৰ্ণ নিষিদ্ধ, ইয়াৰ ফলত বাস্তুৰ গুৰুতৰ দোষৰ সৃষ্টি হয়।
• যদি দুৱাৰখন নিজেই দক্ষিণ দিশত থাকে, তেন্তে বাস্তু অনুসৰি ইয়াৰ সঠিক স্থান নিৰ্ণয় কৰক।
২/ দুৱাৰৰ ৰং আৰু চিহ্ন
• দুৱাৰৰ ৰং পোহৰ, শুভ আৰু শক্তি বৃদ্ধিকাৰী ৰাখক - যেনে পাতল সেউজীয়া , বগা, পাতল নীলা, পাতল গুলপীয়া।
• মূল দুৱাৰত স্বস্তিকা, ওম, মংগল কলশ আদি শুভ প্ৰতীক স্থাপন কৰক।
• দুৱাৰৰ দুয়োকাষে দক্ষিণমুখী শংখ , গণেশৰ ছবি নাইবা পঞ্চমুখী হনুমানৰ ছবি লগালে শুভ বুলি গণ্য কৰা হয়।
৩/ প্ৰৱেশদ্বাৰৰ উচ্চতা মনত ৰাখিব
• দক্ষিণমুখী ঘৰত মূল দুৱাৰৰ উচ্চতা আৰু প্ৰস্থ ভালকৈ ৰাখক যাতে সূৰ্য্যৰ গৰম ৰশ্মি পোনে পোনে ঘৰত প্ৰৱেশ নকৰে।
• এটা মজবুত আৰু সজোৱা কাঠৰ দুৱাৰ স্থাপন কৰক।
৪/ দক্ষিণৰ দেৱালখন শক্তিশালী কৰক
• দক্ষিণ দিশৰ বেৰ আটাইতকৈ ডাঠ, গধুৰ আৰু ওখ হ’ব লাগে আৰু ঘৰৰ ভিতৰৰ বেৰখনো ডাঠ হ'ব লাগে।
• এই দিশত ডাঙৰ ডাঙৰ খিৰিকী বনোৱাৰ পৰা বিৰত থাকক।
৫/ উত্তৰ-পূব কোণটো খোলা ৰাখিব
• উত্তৰ-পূব কোণটো সদায় পৰিষ্কাৰ, মুকলি আৰু পোহৰ কৰি ৰাখক।
• Fountain, কুঁৱা, সৰু পুখুৰীৰ দৰে পানীৰ উৎস এই দিশত ৰখাটো শুভ।
৬/ কোনো পানীৰ উৎস দক্ষিণ দিশত নাৰাখিব
পানীৰ টেংকি, Fountain বা আন যিকোনো পানীৰ উৎস দক্ষিণ দিশত ৰখাটো এটা ডাঙৰ বাস্তুৰ দোষ। ইয়াৰ ফলত আৰ্থিক লোকচান হয়।
৭/ দক্ষিণ দিশত পাকঘৰ
পাৰিলে পাকঘৰটো অগ্নি কোণত (দক্ষিণ-পূব)হে ৰাখক।
যদি আপুনি দক্ষিণ দিশত পাকঘৰ সাজিবলৈ বাধ্য হয়, তেন্তে গেছৰ চৌকাটো পূব বা উত্তৰ দিশত ৰাখক।
৮/ পূজা ঘৰৰ স্থান
• উত্তৰ-পূব দিশত (ঈশান কোণ) পূজা ঘৰ সাজিলে ভাল।
• দক্ষিণ দিশত পূজা ঘৰ নিৰ্মাণ কৰাটো উপযুক্ত নহয়।
৯/ গধুৰ ওজন বস্তু দক্ষিণ দিশত ৰাখিব লাগে
• দক্ষিণ দিশটোক স্থিৰতাৰ প্ৰতীক বুলি গণ্য কৰা হয়।
গধুৰ আলমাৰী, চেফ, লাইব্ৰেৰী, আৰু অন্যান্য গধুৰ বস্তু এই দিশত ৰাখক। যন্ত্ৰ পাতিও এই দিশত ৰাখিব লাগে।
১০/ ধনাত্মক শক্তিৰ বাবে অন্যান্য ব্যৱস্থা
• ঘৰৰ মূল প্ৰৱেশদ্বাৰত নিতৌ এটা বন্তূ জ্বলাব।
• গৰুৰ প্ৰস্ৰাৱ, গংগা পানী বা নিমখীয়া পানীৰে সপ্তাহত এবাৰ মজিয়া মচিব লাগে।
• লঘু ধূপ নিয়মিতভাৱে লগাব ।
• দক্ষিণ দিশত দাপোন ৰাখিব নালাগে।
দক্ষিণমুখী ঘৰ এটা অশুভ বুলি থকা সাধাৰণ বিশ্বাস সম্পূৰ্ণ শুদ্ধ নহয়। বাস্তু শাস্ত্ৰৰ মতে কোনো দিশ নিজৰ মাজতে ত্ৰুটিপূৰ্ণ নহয়; সেই দিশটো সঠিকভাৱে ব্যৱহাৰ নকৰিলেহে দোষৰ সৃষ্টি হয়।
যদি আপুনি দক্ষিণমুখী ঘৰ কিনিছে বা আপোনাৰ ঘৰটো ইতিমধ্যে দক্ষিণমুখী, তেন্তে ওপৰত উল্লেখ কৰা ব্যৱস্থা গ্ৰহণ কৰি আপুনি ঘৰটো বাস্তু বন্ধুত্বপূৰ্ণ কৰি তুলিব পাৰিব।
মনত ৰাখিব, ঘৰত ইতিবাচক শক্তি কেৱল দিশৰ পৰাই নহয়, আপোনাৰ আচৰণ, চিন্তা, পৰিৱেশৰ পৰাও আহে। গতিকে ঘৰটো সদায় পৰিষ্কাৰ, সুসংগঠিত আৰু ইতিবাচক শক্তিৰে ভৰা ৰাখক। দক্ষিণমুখী ঘৰ এটাকো সঠিক বাস্তুৰে সুখ আৰু সমৃদ্ধিৰ ঘৰ হিচাপে গঢ়ি তুলিব পাৰি।
