ৰৌ মাছৰ সৈতে টেঙামৰা ( Roselle) ব্যঞ্জন আৰু ইয়াৰ স্বাস্থ্য উপকাৰীতা
( অপূৰ্ব দাস )
অসমীয়াত টেঙামৰা নামেৰে জনাজাত Roselle এবিধ ঔষধি উদ্ভিদ যাৰ উদ্ভিদবিজ্ঞানৰ নাম হিবিস্কাছ ছাবদাৰিফা। ইয়াৰ ফুল আৰু পাত খাদ্যত ব্যৱহাৰ কৰা হয়। ভাৰতৰ কিছুমান ঠাইত ইয়াক খাদ্য হিচাপে ব্যৱহাৰ কৰা হয় আৰু বিশেষকৈ ওড়িশা, ছত্তীশগড়, ঝাৰখণ্ড, অসম আৰু উত্তৰ-পূৰ্বাঞ্চলৰ ৰাজ্যসমূহত ই এক জনপ্ৰিয় শাক।
টেঙামৰাৰ স্বাস্থ্য উপকাৰীতা :
(১) পাচনতন্ত্ৰৰ বাবে উপকাৰী
টেঙামৰাৰ পাতত থকা প্ৰাকৃতিক এচিডিক যৌগবোৰে পাচনত সহায় কৰে। গেছ, বদহজম আৰু কোষ্ঠকাঠিন্যৰ সমস্যা দূৰ কৰাত ই সহায়ক।
(২) ৰক্তচাপ নিয়ন্ত্ৰণ কৰে
উচ্চ ৰক্তচাপৰ বাবে ইয়াৰ ফুল বিশেষভাৱে উপকাৰী বুলি গণ্য কৰা হয়। ইয়াৰ সেৱনে তেজৰ ধমনী শিথিল কৰে, যাৰ ফলত ৰক্তচাপ ভাৰসাম্যপূৰ্ণ হৈ থাকে।
(৩) এন্টিঅক্সিডেন্ট গুণেৰে সমৃদ্ধ
ইয়াত এন্থ’চাইনিন, ফ্লেভন’ইড আৰু পলিফিনলৰ দৰে শক্তিশালী এন্টিঅক্সিডেন্ট থাকে, যিয়ে শৰীৰক ফ্ৰী ৰেডিকেলৰ পৰা ৰক্ষা কৰে আৰু কেন্সাৰৰ দৰে ৰোগৰ সম্ভাৱনা হ্ৰাস কৰে।
(৪) ওজন কমাবলৈ সহায় কৰে
টেঙামৰা খোৱাৰ ফলত বিপাকীয় ক্ৰিয়া ক্ষিপ্ৰ হয়, যিয়ে ওজন কমাবলৈ সহায় কৰে। ইয়াৰ উপৰিও ই ভোক নিয়ন্ত্ৰণ কৰে।
(৫) বাতবিষ আৰু প্ৰদাহৰ পৰা উপশম
এই উদ্ভিদৰ প্ৰদাহ নিবাৰণকাৰী গুণ আছে যিয়ে গাঁঠিৰ বিষ, প্ৰদাহ আৰু বাতবিষৰ পৰা উপশম দিয়ে।
(৬) যকৃতৰ বাবে উপকাৰী
ইয়াৰ পাত যকৃতক বিষমুক্ত কৰি সুস্থ কৰি ৰাখে। ই যকৃতৰ কোষ পুনৰ উৎপাদন কৰাত সহায়ক।
(৭) ঋতুস্ৰাৱৰ সকাহ
মহিলাৰ ঋতুস্ৰাৱৰ সময়ত বিষ আৰু খজুৱতি কমোৱাত ইয়াৰ পাতে সহায় কৰে।
(৮) ৰোগ প্ৰতিৰোধ ক্ষমতা শক্তিশালী কৰে
ভিটামিন চিৰ পৰিমাণ বেছি হোৱাৰ বাবে ইয়ে ৰোগ প্ৰতিৰোধ ক্ষমতা বৃদ্ধি কৰে আৰু সাধাৰণ চৰ্দিৰ বিৰুদ্ধে যুঁজ দিয়াত সহায় কৰে।
(১০) গৰমৰ পৰা সকাহ দিয়ে
ইয়াৰ পাত বা ফলৰ আঞ্জা খালে গৰমৰ পৰা সকাহ পোৱা যায়। লগতে ৰোগ প্ৰতিৰোধ ক্ষমতা বৃদ্ধি কৰে।
এনেকৈ ৰান্ধিব টেঙামৰা আৰু ৰৌ মাছৰ আঞ্জাঃ
বিশেষকৈ অসম, ওড়িশা, ঝাৰখণ্ড আৰু ছত্তীশগড়ত এই ৰেচিপি জনপ্ৰিয়, য’ত মানুহে টেঙামৰাৰ পাত আৰু মাছ মিহলাই টেঙা সোৱাদযুক্ত ব্যঞ্জন তৈয়াৰ কৰে।
উপকৰণ:
ৰৌ মাছ – ৫০০ গ্ৰাম (টুকুৰাকৈ কাটি)
টেঙামৰাৰ পাত – ১ কাপ (ভালকৈ ধুই কাটি লওক)
সৰিয়হৰ তেল – ৪ চামুচ
নহৰু – এটা ( গুড়ি কৰি ল'ব )
পিঁয়াজ – ১ টা মধ্যমীয়া (মিহিকৈ কাটি লোৱা)
সেউজীয়া জলকীয়া – ২ টা কাটি ল'ব ।
হালধিৰ গুড়ি – ১/২ চামুচ
ৰঙা জলকীয়াৰ গুড়ি – ১ চামুচ
নিমখ – ৰুচি অনুসৰি
পানী – প্ৰয়োজন অনুসৰি
পদ্ধতিঃ
(১) মাছ ভাজি ল'ব :
• প্ৰথমে মাছৰ টুকুৰাবোৰ হালধি আৰু নিমখ দি ১০-১৫ মিনিট মেৰিনেট কৰক।
• কেৰাহীত সৰিয়হৰ তেল গৰম কৰি মাছখিনি দুয়োফালে সোণালী বৰণৰ হোৱালৈকে ভাজিব।
• প্লেট এখনত ভজা মাছখিনি উলিয়াই লওক।
(২) টেঙামৰাৰ পাত এনেদৰে ৰান্ধিব
• একেখন কেৰাহীতে অলপ তেল, পিঁয়াজ আৰু কেঁচা জলকীয়া দি ভাজিব।
• তাৰ পিছত নহৰু পেষ্ট দি সোণালী হোৱালৈকে ভাজিব।
• এতিয়া হালধি আৰু জলকীয়াৰ গুড়ি দি অলপ পানী দি মছলা ৰান্ধিব।
• এতিয়া টেঙামৰাৰ পাত দি ৫-৬ মিনিট মান ৰান্ধিব যেতিয়ালৈকে পাতবোৰ কোমল নহয় আৰু ইয়াৰ টেঙা ৰস মছলাৰ লগত মিহলি নহয়।
(৩) এনেদৰে আঞ্জাখন ৰান্ধিব
• এতিয়া মছলাত ভজা মাছখিনি দি লাহে লাহে মিহলাই লওক।
• প্ৰয়োজন অনুসৰি পানী দি কম জুইত ১০ মিনিট উতলিবলৈ দিব যাতে মাছৰ সোৱাদবোৰ ভালদৰে মিহলি হয়। নিজৰ পচন্দৰ বিভিন্ন মচলা দিব পাৰে।
• গেছ বন্ধ কৰি ঢাকি ৫ মিনিট ৰাখিব।
এনেদৰে পৰিবেশন কৰিব:
এই টেঙামৰাৰ সৈতে মাছৰ আঞ্জা খন ভাতৰ সৈতে পৰিবেশন কৰক। ই সোৱাদত অনন্য আৰু পুষ্টিৰে ভৰপূৰ।
টেঙামৰা এবিধ ঔষধি উদ্ভিদ যিয়ে খাদ্যৰ সোৱাদ বৃদ্ধি কৰাই নহয়, বহুতো ৰোগ প্ৰতিৰোধ কৰে। বিশেষকৈ ৰৌৰ দৰে পুষ্টিকৰ মাছৰ লগত মিহলি কৰিলে সম্পূৰ্ণ আৰু স্বাস্থ্যকৰ আহাৰ হৈ পৰে। পৰম্পৰাগত ৰেচিপিত লুকাই থকা এনে অনন্য উপাদান গ্ৰহণ কৰি আমি আমাৰ স্বাস্থ্যৰ উন্নতি সাধন কৰিব পাৰো।
ৰেচিপিটো কেনে লাগিল জনাবলৈ নাপাহৰিব। আশাকৰোঁ এনেধৰণৰ খাদ্যৰ জুতিৰ বাবে চাই থাকিব গুড অসম।
