সাৱধান! প্ৰ'টিন পাউদাৰে বৃক্কৰ ক্ষতি কৰিব পাৰে।
(অপূৰ্ব দাস)
আজিকালি যুৱক-যুৱতীসকলৰ মাজত ফিটনেছ আৰু বডি বিল্ডিঙৰ উন্মাদনা দ্ৰুতগতিত বৃদ্ধি পাইছে। সকলোৱেই আকৰ্ষণীয় শৰীৰ আৰু ছয় পেক এবছৰ আকাংক্ষা কৰে। জিমত ৱৰ্কআউট কৰাৰ লগতে মানুহে খাদ্য পৰিকল্পনাত প্ৰটিন পাউদাৰো অন্তৰ্ভুক্ত কৰে। কিন্তু বহুতে গম নাপায় যে চিকিৎসক বা খাদ্য বিশেষজ্ঞৰ পৰামৰ্শ নোলোৱাকৈ অত্যধিক পৰিমাণৰ প্ৰটিন সেৱন কৰিলে ক্ষতিকাৰক হ’ব পাৰে। শৰীৰত প্ৰকৃততে কিমান প্ৰটিনৰ প্ৰয়োজন, ব্যায়ামকাৰীৰ বাবে কিমান প্ৰটিনৰ প্ৰয়োজন, কোনবোৰ প্ৰটিন পাউদাৰ নিৰাপদ, আৰু ইয়াৰ কি সম্ভাৱ্য পাৰ্শ্বক্ৰিয়া হ’ব পাৰে, সেই বিষয়ে জানো আহক -
(১) আমি দৈনিক কিমান পৰিমাণৰ প্ৰটিন সেৱন কৰিব লাগে?
প্ৰটিন আমাৰ শৰীৰৰ এক গুৰুত্বপূৰ্ণ পুষ্টিকৰ উপাদান, পেশী, ছাল, চুলি, হাড়, আৰু ৰোগ প্ৰতিৰোধ ক্ষমতা শক্তিশালী কৰাৰ বাবে অপৰিহাৰ্য। কিন্তু প্ৰটিনৰ প্ৰয়োজনীয়তা ব্যক্তিভেদে বেলেগ বেলেগ। বয়স, ওজন আৰু শাৰীৰিক কাৰ্যকলাপৰ ওপৰত নিৰ্ভৰ কৰে।
◽এজন ব্যক্তিৰ বাবে প্ৰটিনৰ প্ৰয়োজনীয়তা:
এজন সুস্থ ব্যক্তিক প্ৰতি কিলোগ্ৰাম শৰীৰৰ ওজনত প্ৰতিদিনে ০.৮ৰ পৰা ১ গ্ৰাম প্ৰটিনৰ প্ৰয়োজন হয়।
উদাহৰণস্বৰূপে, যদি কোনো ব্যক্তিৰ ওজন ৬০ কিলোগ্ৰাম হয় তেন্তে তেওঁক দৈনিক প্ৰায় ৪৮ৰ পৰা ৬০ গ্ৰাম প্ৰটিনৰ প্ৰয়োজন হয়।
◽প্ৰাকৃতিক উৎসৰ পৰা পোৱা প্ৰটিন:
• গাখীৰ আৰু দৈ
• কণী (এটা কণীত প্ৰায় ৬ গ্ৰাম প্ৰটিন থাকে)
• দালি (মগু, বিন, মচুৰ দাইল, গজালি ওলোৱা বুট, ৰাজমাহ, মাটিমাহ ইত্যাদি)
• পনীৰ, টোফু
• চয়াবিন প্ৰটিন
• মাছ, কুকুৰা মাংস আৰু অন্যান্য মাংস
যদি আপুনি নিয়মিতভাৱে এই খাদ্যসমূহ আপোনাৰ খাদ্য তালিকাত অন্তৰ্ভুক্ত কৰে তেন্তে আপুনি পৰ্যাপ্ত পৰিমাণৰ প্ৰটিন লাভ কৰিব পাৰে আৰু পৰিপূৰক খাদ্যৰ প্ৰয়োজনীয়তাৰ পৰা হাত সাৰিব পাৰে।
💪 ২/ ব্যায়াম কৰা বা জিমলৈ যোৱা লোকে কিমান প্ৰটিন সেৱন কৰিব লাগে?
জিমত দৈনিক ৱৰ্কআউট কৰা বা বডি বিল্ডিঙৰ দিশত কাম কৰা লোকসকলক সাধাৰণ মানুহতকৈ অধিক প্ৰটিনৰ প্ৰয়োজন হয় কাৰণ ব্যায়ামৰ ফলত পেশীৰ সামান্য ক্ষতি হয়, যিটো প্ৰটিন মেৰামতিৰ বাবে অতি প্ৰয়োজনীয়।
◽ব্যায়াম কৰা বা খেলুৱৈৰ বাবে প্ৰটিনৰ প্ৰয়োজনীয়তা:
যিসকলে লঘু ব্যায়াম কৰে তেওঁলোকৰ শৰীৰৰ ওজনৰ প্ৰতি কিলোগ্ৰামত ১.২ৰ পৰা ১.৬ গ্ৰাম প্ৰটিনৰ প্ৰয়োজন হয়।
যিসকলে পেশী গঠন কৰে বা গধুৰ ওজন প্ৰশিক্ষণত লিপ্ত হয় তেওঁলোকক প্ৰতি কিলোগ্ৰামত প্ৰায় ১.৬ৰ পৰা ২ গ্ৰাম প্ৰটিনৰ প্ৰয়োজন হয়।
উদাহৰণস্বৰূপে, যদি আপুনি ৭০ কিলোগ্ৰাম ওজন আৰু পেশী গঠন কৰি আছে তেন্তে দৈনিক প্ৰায় ১১০ৰ পৰা ১৩০ গ্ৰাম প্ৰটিন খাব লাগে। কিন্তু এই প্ৰটিন প্ৰাকৃতিক খাদ্য আৰু পৰিপূৰক উভয়ৰে পৰা লাভ কৰিব লাগে।
(৩) কোনবিধ প্ৰটিন পাউদাৰ ব্যৱহাৰ কৰিব লাগে?
Whey Protein, Casein Protein, Soy Protein আৰু উদ্ভিদ ভিত্তিক প্ৰ'টিন আদি বজাৰত উপলব্ধ প্ৰটিনৰ পৰিপূৰক। প্ৰতিজন ব্যক্তিৰ শৰীৰৰ ওপৰত নিৰ্ভৰ কৰি ইয়াৰ উপযোগিতা ভিন্ন হয়।
(১) ৱেই প্ৰটিন: এইটোৱেই আটাইতকৈ জনপ্ৰিয় আৰু সহজে হজম হোৱা প্ৰটিন। ইয়াক গাখীৰৰ পৰা আহৰণ কৰা হয় আৰু পেশীৰ বৃদ্ধিৰ বাবে ভাল বুলি গণ্য কৰা হয়।
উপকাৰ: সোনকালে শোষণ কৰে।
কেতিয়া ল’ব লাগে: ৱৰ্কআউট কৰাৰ লগে লগে।
(২) কেচিন প্ৰটিনঃ লাহে লাহে হজম হয় আৰু ৰাতি খোৱাৰ উপযোগী।
উপকাৰ: পেশী মেৰামতি কৰাত সহায় কৰে।
কেতিয়া ল’ব লাগে: শুৱাৰ আগতে।
(৩) চয়া প্ৰটিন: নিৰামিষভোজীৰ বাবে এইটো এটা উৎকৃষ্ট বিকল্প।
উপকাৰ: কলেষ্টেৰল কমোৱাত সহায় কৰে।
(৪) উদ্ভিদ ভিত্তিক প্ৰটিন: মচুৰ দাইল, বুটল দাইল, চিয়া গুটি আদিৰ পৰা তৈয়াৰ কৰা হয়।
লাভ: এলাৰ্জী থকাসকলৰ বাবে নিৰাপদ বিকল্প।
টিপচ্: প্ৰটিন পাউদাৰ ক্ৰয় কৰাৰ সময়ত সদায় আই এছ অ’ প্ৰমাণিত বা এফ এছ এছ এ আই অনুমোদিত ব্ৰেণ্ড বাছি লওক। যিকোনো প্ৰটিন পাউদাৰ ব্যৱহাৰ কৰাৰ আগতে পুষ্টিবিদ বা চিকিৎসকৰ পৰামৰ্শ লৈ শৰীৰৰ প্ৰয়োজন আৰু স্বাস্থ্যৰ বাবে উপযোগী নেকি সেইটো নিৰ্ণয় কৰক।
(৪) প্ৰটিন পাউদাৰৰ পাৰ্শ্বক্ৰিয়া
প্ৰটিন পাউদাৰ উপকাৰী হ’লেও অত্যধিক সেৱনে শৰীৰৰ ওপৰত কেইবাটাও বিৰূপ প্ৰভাৱ পেলাব পাৰে।
(১) বৃক্কৰ প্ৰভাৱঃ অত্যধিক প্ৰটিন সেৱনে বৃক্কত অতিৰিক্ত সমস্যাত পেলায় কাৰণ প্ৰটিন ভাঙিলে ইউৰিয়া উৎপন্ন হয়, যিটো আঁতৰোৱাৰ বাবে বৃক্ক দায়বদ্ধ। দীৰ্ঘদিন ধৰি অতিৰিক্ত বোজা পালে বৃক্কৰ কাৰ্য্যক্ষমতা হ্ৰাস পায়, আনকি বৃক্ক বিকল হ’ব পাৰে।
(২) যকৃতৰ ওপৰত চাপঃ অত্যধিক প্ৰটিন বিপাকীয় ক্ৰিয়াই যকৃতৰ ওপৰত অতিমাত্ৰা চাপ পৰে। ইয়াৰ ফলত যকৃত Fatty Liver বা যকৃতৰ প্ৰদাহ হ’ব পাৰে।
(৩) পাচনতন্ত্ৰৰ সমস্যাঃ অত্যধিক প্ৰ’টিন সেৱন কৰিলে বিশেষকৈ পৰ্যাপ্ত পৰিমাণৰ পানী সেৱন নকৰিলে কোষ্ঠকাঠিন্য, গেছ বা পেট ফুলা হ’ব পাৰে।
(৪) হাড়ৰ দুৰ্বলতা: অত্যধিক প্ৰ’টিনৰ ফলত শৰীৰত কেলচিয়ামৰ অভাৱ হ’ব পাৰে, যাৰ ফলত হাড় দুৰ্বল হৈ পৰে।
(৫) ওজন বৃদ্ধিঃ বহুতো প্ৰটিনৰ গুড়িত চেনি আৰু সোৱাদ যোগ কৰা হয়। নিয়মিতভাৱে সেৱন কৰিলে শৰীৰৰ চৰ্বি বৃদ্ধি পায় আৰু ওজন কমি যোৱাৰ পৰিৱৰ্তে ওজন বৃদ্ধি হ’ব পাৰে।
(৬) এলাৰ্জী আৰু ছালৰ সমস্যাঃ কিছুমান মানুহৰ ৱেই বা চয়া প্ৰটিনৰ প্ৰতি এলাৰ্জি হ’ব পাৰে, যাৰ ফলত ছালৰ ফোহা বা ব্ৰণ হ’ব পাৰে।
◽নিৰাপদ আৰু সুষম পন্থা
শৰীৰৰ প্ৰয়োজন আৰু ব্যায়ামৰ তীব্ৰতাৰ ওপৰত ভিত্তি কৰি প্ৰটিন গ্ৰহণৰ পৰিমাণ সদায় সালসলনি কৰক।
গোটেই দিনটো পৰ্যাপ্ত পৰিমাণৰ পানী (৩–৪ লিটাৰ) খাব লাগে যাতে বৃক্কত চাপ নপৰে।প্ৰটিনৰ বেছিভাগেই প্ৰাকৃতিক উৎসৰ পৰা ল’বলৈ চেষ্টা কৰক।
যেতিয়া আপোনাৰ খাদ্যই আপোনাৰ প্ৰয়োজন পূৰণ নকৰে তেতিয়াহে পৰিপূৰক গ্ৰহণ কৰক। যিকোনো ব্ৰেণ্ডৰ প্ৰটিন ক্ৰয় কৰাৰ আগতে লেবেলটো ভালদৰে পঢ়িব লাগে।
শৰীৰৰ বাবে প্ৰটিন অপৰিহাৰ্য, কিন্তু "অধিক" নহয়। যদি আপুনি কেৱল পেশী গঠনৰ বাবে চিকিৎসকৰ পৰামৰ্শ নোলোৱাকৈ প্ৰটিন পাউদাৰ সেৱন কৰি আছে, তেন্তে ই আপোনাৰ স্বাস্থ্যৰ গুৰুতৰ ক্ষতি কৰিব পাৰে। সঠিক পৰিমাণ, সঠিক সময় আৰু সঠিক প্ৰকাৰৰ প্ৰটিনহে উপকাৰী। গতিকে ফেশ্বনৰ ওপৰত নহয়, প্ৰয়োজনৰ ওপৰত ভিত্তি কৰি প্ৰটিন সেৱন কৰাটো বুদ্ধিমানৰ কাম।
