আপুনি অতি চিন্তা কৰে নেকি? অতিমাত্ৰা চিন্তা কৰাটো নিয়ন্ত্ৰণ কৰিবলৈ এই চাৰিটা অভ্যাস গ্ৰহণ কৰক।
( অপূৰ্ব দাস )
আপুনিও প্ৰতিটো সৰু-ডাঙৰ কথা বাৰে বাৰে চিন্তা কৰেনে? অতীতৰ কোনো ভুল, ভৱিষ্যতৰ চিন্তা, বা কিবা এটা সিদ্ধান্ত ল’ব নোৱাৰাটোৱে আপোনাৰ মনটোক বাৰে বাৰে অশান্তি দি থাকেনে?
যদি হয়, তেন্তে আপুনি অতিৰিক্ত চিন্তাৰ বলি হ’ব পাৰে অৰ্থাৎ প্ৰয়োজনতকৈ বেছি চিন্তা কৰাৰ অভ্যাস হ'ব পাৰে । এই অভ্যাস যিমান সাধাৰণ সিমানেই বিপদজনক। ইয়াৰ ফলত মানসিক স্বাস্থ্যৰ ওপৰত প্ৰভাৱ পৰে, উদ্বেগ আৰু মানসিক চাপ বৃদ্ধি পায়, টোপনিৰ ব্যাঘাত জন্মে, সিদ্ধান্ত গ্ৰহণৰ ক্ষমতাত ব্যাঘাত জন্মে। ভাল খবৰটো হ’ল যে অতিমাত্ৰা চিন্তা কৰাটোৰ পৰা আঁতৰি থাকিব পাৰি — যদি আমি কিছুমান ভাল অভ্যাস গ্ৰহণ কৰো।
এই লেখাটোত অতিৰিক্ত চিন্তাধাৰা নিয়ন্ত্ৰণ কৰিবলৈ চাৰিটা অতি ফলপ্ৰসূ অভ্যাসৰ বিষয়ে জানিব পাৰিব, যিবোৰ গ্ৰহণ কৰিলে আপুনি মানসিক শান্তি পাব পাৰে।
১/ নিজৰ চিন্তাবোৰ লিখাৰ অভ্যাস গঢ়ি তোলক
যেতিয়া আমি মনতে একেটা কথাকে বাৰে বাৰে ভাবোঁ তেতিয়া সেই চিন্তাই ক্ৰমান্বয়ে এক দানৱীয় ৰূপ ধাৰণ কৰে। মনত অস্থিৰতা আৰু কোনো সমাধান পোৱা নাযায়। এনে সময়ত আটাইতকৈ সহজ আৰু ফলপ্ৰসূ উপায় হ’ল নিজৰ চিন্তাবোৰ লিখি থোৱা।
লিখি থলে আমাৰ চিন্তাধাৰাক এটা বান্ধনত ৰখাত সহায় কৰে। কোনবোৰ কথা গুৰুত্বপূৰ্ণ আৰু কোনবোৰ নহয় আমি তেতিয়া বুজি পোৱাত যথেষ্ট সহায় হয় । ইয়াৰ উপৰিও সমস্যা এটা লিখিলে সমাধানটো নিজই বিচাৰি উলিওৱাৰ প্ৰৱণতা থাকে।
কেনেকৈ গ্ৰহণ কৰিব:
(ক) ডায়েৰী বা বহী এখন ৰাখক আৰু প্ৰতি নিশা ১০-১৫ মিনিট সময় দিনটোৰ চিন্তাৰ মূল কথাবোৰ লিখি থ’ব লাগে।
(খ) বিশেষকৈ যিবোৰ কথাই আপোনাক বাৰে বাৰে আমনি কৰি আছে সেইবোৰ লিখি থওক।
(গ) লাহে লাহে আপুনি দেখিব যে আপোনাৰ মনটো শান্ত হৈ আহিছে আৰু আপোনাৰ চিন্তাধাৰাৰ উন্নতি হৈছে।
২/ Mindfulness আৰু মেডিটেচনৰ অভ্যাস কৰক
অতিমাত্ৰা চিন্তা কৰাটো প্ৰায়ে অতীতৰ ভুল বা ভৱিষ্যতৰ চিন্তাৰ সৈতে জড়িত হৈ থাকে। আমাৰ মনটো বৰ্তমানৰ পৰা আঁতৰি আমাৰ নিয়ন্ত্ৰণ নথকা ঠাইলৈ বিচৰণ কৰে। এনে পৰিস্থিতিত Mindfulness অৰ্থাৎ বৰ্তমান সময়ত জীয়াই থকাৰ অভ্যাস অতি উপকাৰী।
মাইণ্ডফুলনেছৰ অভ্যাসে আপোনাৰ চিন্তাধাৰাক নিৰীক্ষণ কৰাত সহায় কৰে আৰু কোনবোৰ চিন্তাই আপোনাক দুখৰ সৃষ্টি কৰিছে সেই কথা বুজিবলৈ সহায় কৰে। ইয়াৰ উপৰিও ই আপোনাক বৰ্তমানৰ মুহূৰ্তত জীয়াই থকাৰ ক্ষমতা প্ৰদান কৰে, যিয়ে অতিৰিক্ত চিন্তাধাৰাক নিয়ন্ত্ৰণ কৰাত সহায় কৰিব পাৰে।
কেনেকৈ গ্ৰহণ কৰিব:
(ক) প্ৰতিদিনে পুৱা ১০-১৫ মিনিট ধ্যান কৰক।
(খ) যিকোনো কাম কৰি থাকোঁতে সম্পূৰ্ণ একাগ্ৰতাৰে কৰক – সেয়া খাদ্য খোৱাই হওক, খোজ কঢ়াই হওক বা কাৰোবাৰ লগত কথা পতাই হওক। আন কথা চিন্তা কৰিব নালাগে। লগতে দুখৰ চিন্তা, জীৱনত কৃতকাৰ্য হ'ব নোৱাৰা কথা পৰিহাৰ কৰি নিজেও যে এজন ব্যক্তি সেই কথা ভাবি চিন্তাবোৰ ত্যাগ কৰিব লাগে।
প্ৰতিবাৰেই আপোনাৰ মনোযোগ বিচলিত হ’লে নিজকে বৰ্তমানলৈ ঘূৰাই আনিবলৈ চেষ্টা কৰক।
৩/ সিদ্ধান্ত গ্ৰহণৰ ক্ষমতা বিকাশ কৰা
অতিমাত্ৰা চিন্তা কৰাৰ এটা ডাঙৰ কাৰণ হ’ল সিদ্ধান্ত ল’ব নোৱাৰা। আমি ভাবি থাকোঁ যে আমি এনে কৰিলে কি হ’ব। আমি এই বিষয়ে চিন্তা কৰি ঘণ্টাৰ পিছত ঘণ্টা, দিন বা কেতিয়াবা মাহৰ পিছত মাহ ধৰি কটাওঁ। কিন্তু ইয়াৰ দ্বাৰা কোনো লাভ পোৱা নাযায় আৰু কোনো সমাধানো পোৱা নাযায়।
স্পষ্ট সিদ্ধান্ত লোৱা আৰু সেইটোত বাৰে বাৰে চেষ্টা কৰি থকাটো অতিমাত্ৰা চিন্তা কৰাৰ পৰা মুক্তি পোৱাৰ এক গুৰুত্বপূৰ্ণ উপায়। সময়মতে সিদ্ধান্ত ল’বলৈ শিকা উচিত তেতিয়া আপোনাৰ মনটোৱে অসাৰ চিন্তাৰ মাজত আবদ্ধ হৈ পৰাৰ সুযোগ নাপায়।
কেনেকৈ গ্ৰহণ কৰিব:
(ক) যিকোনো সিদ্ধান্ত লোৱাৰ সময়ত ইয়াৰ লাভ-লোকচানৰ তালিকা এখন বনাওক।
(খ) সেই তালিকাখন চাওক আৰু কোনটো পথ ল’ব বিচাৰে সেইটো নিৰ্ণয় কৰক।
(গ) এবাৰ সিদ্ধান্ত লোৱাৰ পিছত সেই সিদ্ধান্তত উপনীত হৈ বাৰে বাৰে নাভাবিব।
৪/ সুষম ৰুটিন আৰু ব্যায়াম গ্ৰহণ কৰক
আপোনাৰ শৰীৰ আৰু মন ইটোৱে সিটোৰ লগত সংযুক্ত হৈ আছে। যদি আপোনাৰ দৈনন্দিন ৰুটিন বিঘ্নিত হয়, আপুনি পৰ্যাপ্ত পৰিমাণে টোপনি পোৱা নাই, আপোনাৰ খাদ্যাভ্যাস ভাৰসাম্যহীন হ'য়, আৰু কোনো শাৰীৰিক ক্ৰিয়া-কলাপ নাথাকে বা কৰ্মত ব্যস্ত নাথাকে – তেতিয়া মনটো অস্থিৰ হৈ পৰিব আৰু আপোনাৰ চিন্তাৰ গতি অনিয়ন্ত্ৰিত হৈ পৰিব।
নিয়মীয়া ৰুটিন, যোগ বা ব্যায়াম, আৰু সুষম খাদ্যই আপোনাৰ শাৰীৰিক স্বাস্থ্য ভাল অৱস্থাত ৰখাই নহয়, মানসিকভাৱেও সুস্থিৰ কৰি তোলে।
• কেনেকৈ গ্ৰহণ কৰিব:
(ক) প্ৰতিদিনে ৰাতিপুৱা একে সময়তে উঠি ৰাতি সময়মতে শুই (১০:৩০) থকাটো অভ্যাস কৰি লওক।
(খ) কমেও ৩০ মিনিট শাৰীৰিক কাৰ্য্যকলাপ কৰক — যেনে খোজ কঢ়া, যোগাসন, নৃত্য বা জিম।
(গ) লঘু, পুষ্টিকৰ আৰু সতেজ খাদ্য খাওক।
(ঘ) কেফেইন আৰু প্ৰচেছড খাদ্য পৰিহাৰ কৰক কাৰণ এইবোৰে মনক আৰু অধিক উদ্দীপিত কৰাৰ প্ৰৱণতা থাকে।
(ঙ) ছ’চিয়েল মিডিয়া কম ব্যৱহাৰ কৰক। ইয়াৰ ফলত অতিমাত্ৰা চিন্তা কৰাটোও প্ৰসাৰিত হয়।
(চ) নিজৰ লগত কথা পাতক আৰু ইতিবাচক দৃঢ়তা পুনৰাবৃত্তি কৰক যেনে:
"মই থিকে আছো"
"প্ৰতিটো সমস্যাৰ সমাধান আছে।"
"মই যি কৰি আছো সেয়া মোৰ দ্বাৰা ঠিকেই আছে।"
অতিমাত্ৰা চিন্তা কৰাটো কোনো দুৰাৰোগ্য ৰোগ নহয়, বৰঞ্চ এটা অভ্যাস—আৰু প্ৰতিটো অভ্যাস সলনি কৰিব পাৰি। যদি আপুনি ওপৰৰ চাৰিটা অভ্যাস আপোনাৰ দৈনন্দিন জীৱনত অন্তৰ্ভুক্ত কৰে তেন্তে আপুনি নিশ্চিতভাৱে অতিৰিক্ত চিন্তা কৰাৰ এই অভ্যাস নিয়ন্ত্ৰণ কৰিব পাৰিব।
মনত ৰাখিব, বেছি চিন্তা কৰিলেই সমাধান পোৱা নাযায় — সমাধান কৰিলেহে পোৱা যায়। গতিকে চিন্তা কৰক, কিন্তু সঠিক দিশত চিন্তা কৰক।
